میگھالیہ میں آیا 2.8 کی شدت کا زلزلہ، مغربی کھاسی ہلز میں 10 کلومیٹر گہرائی پر تھا مرکز

نیشنل سنٹر فار سیسمولوجی (این سی ایس) نے اتوار (31 مئی) کی صبح میگھالیہ میں زلزلے کے ہلکے جھٹکے ریکارڈ کیے۔ ریکٹر اسکیل پر اس زلزلے کی شدت 2.8 ریکارڈ کی گئی۔ زلزلے کا مرکز مغربی کھاسی ہلز ضلع میں تھا۔ نیشنل سنٹر فار سیسمولوجی کے مطابق اتوار کی صبح 6:50 بجے میگھالیہ کے مغربی کھاسی ہلز ضلع میں 2.8 شدت کا ہلکا زلزلہ آیا۔ زلزلے کا مرکز 25.488 شمالی عرض بلد اور 90.995 مشرقی طول بلد پر واقع تھا۔ اس کی گہرائی 10 کلومیٹر بتائی گئی ہے۔ اس زلزلے کا مرکز چیراپونجی سے تقریباً 77 کلومیٹرمغرب-شمال مغرب میں واقع تھا۔ اب تک کسی بھی قسم کے جانی یا مالی نقصان کی اطلاع موصول نہیں ہوئی ہے۔ چونکہ زلزلے کی شدت کم تھی اور گہرائی بھی صرف 10 کلومیٹر تھی، اس لیے اس کا اثر محدود رہا۔ مقامی لوگوں نے ہلکے جھٹکے محسوس کیے، لیکن کسی بھی جگہ سے کسی بڑے نقصان کی کوئی رپورٹ سامنے نہیں آئی ہے۔ اس سے کچھ گھنٹے قبل نیشنل سنٹر فار سیسمولوجی نے تاجکستان میں درمیانی شدت کا ایک زلزلہ ریکارڈ کیا تھا۔ ریکٹر اسکیل پر اس زلزلے کی شدت 5.2 درج کی گئی۔ زلزلے کا وقت 31 مئی 2026، صبح 02:45:57 بجے آئی ایس ٹی تھا۔ اس کا مرکز 38.187 شمالی عرض بلد اور 73.742 مشرقی طول بلد پر 120 کلومیٹر کی گہرائی میں تھا۔ یہ زلزلہ فیض آباد (افغانستان) سے تقریباً 305 کلومیٹر شمال مشرق میں واقع میں تھا۔ بر صغیر ہند میں زلزلے کی سرگرمیاں معمول کی بات مانی جاتی ہیں کیونکہ ہندوستان کئی فعال فالٹ لائنوں پر واقع ہے۔ شمال مشرقی ہندوستان (میگھالیہ، آسام، اروناچل پردیش وغیرہ) زلزلے کے لحاظ سے انتہائی حساس خطہ ہے۔ یہ علاقہ انڈین پلیٹ اور یوریشین پلیٹ کی ٹیکٹونک سرگرمیوں کی وجہ سے بار بار جھٹکے محسوس کرتا رہتا ہے۔ قابل ذکر ہے کہ میگھالیہ میں 1897 میں آنے والے 8.1 شدت کے ہولناک زلزلے کو تاریخ کا سب سے تباہ کن زلزلہ مانا جاتا ہے، جس میں ہزاروں لوگ متاثر ہوئے تھے۔

Source: social media