مودی حکومت میں فرقہ وارانہ جھڑپوں میں آئی کمی؛ ریاستی اقلیتی کمیشنز کانفرنس میں کرن رجیجو کا دعویٰ

نئی دہلی: نئی دہلی میں سشما سوراج بھون میں قومی کمیشن برائے اقلیتی کے زیر اہتمام منعقدہ 'ریاستی اقلیتی کمیشنز کانفرنس' میں ملک بھر کے نمائندوں نے اقلیتی برادریوں کی ترقی، تعلیم، روزگار، اور انہیں بااختیار بنانے جیسے مسائل پر تبادلہ خیال کیا۔ اس کانفرنس میں مختلف ریاستی اقلیتی کمیشنوں کے چیئرپرسن، اراکین، سینئر عہدیداران، پالیسی ساز، اور کمیونٹی کے نمائندوں نے شرکت کی۔ کانفرنس کا بنیادی مقصد ریاستوں کے درمیان بہتر تال میل قائم کرنا اور اقلیتوں سے متعلق مسائل کو حل کرنے کے لیے ایک مضبوط اور موثر طریقہ کار تیار کرنا تھا۔ تعلیم، روزگار، ہنرمندی کا فروغ، خواتین کو بااختیار بنانے اور نوجوانوں کو مرکزی دھارے میں شامل کرنے جیسے اہم موضوعات پر گہرائی سے تبادلہ خیال کیا گیا۔ اس موقعے پر اظہار خیال کرتے ہوئے مرکزی اقلیتی امور کے وزیر کرن رجیجو نے کہا کہ مرکزی حکومت "سب کا ساتھ، سب کا وکاس، اور سب کا وشواس" کے اصول پر کام کر رہی ہے اور اس بات کو یقینی بنا رہی ہے کہ سرکاری اسکیموں کے فوائد معاشرے کے آخری فرد تک پہنچیں۔ ریاستی اقلیتی کمیشن کی کانفرنس سے خطاب کرتے ہوئے، اقلیتی امور کے مرکزی وزیر رجیجو نے ملک میں فرقہ وارانہ کشیدگی کے واقعات کو ہوا دینے میں سوشل میڈیا پلیٹ فارمز کے منفی کردار پر روشنی ڈالی۔ انہوں نے کہا کہ ڈیجیٹل میڈیا پر جانکاری بہت تیزی سے پھیلتی ہیں، لیکن کچھ عناصر اس رفتار کو سنسنی پھیلانے یا مقامی واقعات کو بڑھا چڑھا کر پیش کرنے کے لیے باقاعدگی سے استعمال کرتے ہیں، جس سے ملک میں فرقہ وارانہ ہم آہنگی کو شدید نقصان پہنچتا ہے۔ تاہم اسی کے ساتھ انہوں نے دعویٰ کیا کہ سال 2014 سے فرقہ وارانہ جھڑپوں میں کمی آئی ہے۔ انہوں نے واضح کیا کہ امن و امان برقرار رکھنا ریاستوں کی بنیادی ذمہ داری ہے۔ وزیر مملکت جارج کورین نے مرکزی اور ریاستی حکومتوں کے درمیان بہتر تال میل کی ضرورت پر زور دیتے ہوئے کہا کہ تعلیم اور ہنرمندی کو فروغ دے کر نوجوانوں کو آگے بڑھانے پر خصوصی توجہ دی جانی چاہیے۔ دانش آزاد انصاری، اقلیتی بہبود، مسلم وقف اور حج، اتر پردیش کے وزیر مملکت نے کہا کہ یوپی میں اقلیتوں کے لیے کئی اسکیمیں چلائی جا رہی ہیں، اور حکومت تعلیم اور روزگار پر خصوصی توجہ دے رہی ہے۔ انہوں نے ایسی کانفرنسز کو ریاستوں کے درمیان تجربات کو بانٹنے کے لیے ایک اچھا پلیٹ فارم قرار دیا۔

Source: social media