لکھنؤ:05فروری: سماج وادی پارٹی(ایس پی) صدر اکھلیش یادو نے بدھ کو کہا کہ اجودھیا کی ملکی پور اسمبلی ضمنی الیکشن میں بی جےپی حکومت کے اشارے پر جمہوریت اور غیر جانبدارانہ الیکشن عمل کی دھجیاں اڑائی گئیں۔ بی جےپی اور انتظامیہ نے کئی جگہوں پر فرضی ووٹنگ کی اور جم کر گھپلے بازی کی۔ یادو نے کہا کہ پولیس انتظامیہ کا رویہ غیر جمہوری رہا۔درجنوں بوتھوں پر سماج وادی پارٹی کے بوتھ ایجنڈوں کو ڈرایا دھمکایا گیا۔بی جےپی نے ملکی پور میں بے ایمانی کے لئے ہر طرح کے ہتھکنڈے اپنائے۔ بی جےپی کے غنڈوں نے ملکی پور ضمنی الیکشن کو متاثر کرنے کے لئے لاقانونیت کی۔ پولیس۔انتظامیہ کا انہیں کھلا تحفظ حاصل رہا۔ پولیس۔انتظامیہ نے بی جے پی کے غنڈوں کو کھلی چھوٹ دے کر انتخابی ضابطہ اخلاق کی سخت خلاف ورزی کی۔ انہوں نے کہا کہ ملکی پور ضمنی الیکشن میں کئی بوتھوں پر انتظامیہ اور بی ایل او نے فرضی ووٹنگ کرائی۔ بی جے پی اقتدار کے تحفظ یافتہ لوگوں نے باہر سے غنڈوں کو بلا کر فرضی ووٹنگ کروای، بوتھ نمبر 158 پر ایس ڈی ایم کے ذریعہ خود بوتھ کیپچرنگ کی شکایت الیکشن کمیشن سے کی گئی۔ کمیشن سے معاملے کو نوٹس میں لے کر ایسے افسران کے خلاف سخت کاروائی کا مطالبہ کیا۔ یادو نے کہا کہ پولیس ۔انتظامیہ نے ووٹروں کے درمیان ڈر کا ماحول بنا کر ووٹنگ کو متاثر کیا گیا۔ بی جےپی کے حامیوں نے خود قبول کیا ہے کہ انہوں نے فرضی ووٹنگ کی ہے۔ تنہا ایک شخص نے چھ ووٹ ڈال دئیے۔ فرضی ووٹنگ کرتے ہوئے کچھ لوگوں کو ایس پی امیدوار اجیت پرساد نے خود پکڑا ہے۔ ایس پی صدر نے کہا کہ ملکی پور ضمنی الیکشن میں رائے پٹی امانی گنج میں فرضی ووٹ ڈالنے کی بات اپنے منھ سے کہنے والے نے صاف کردیا کہ بی جےپی حکومت میں افسران کس طرح سے گھپلے بازی میں ملوث ہیں۔ الیکشن کمیشن کو اور کیا ثبوت چاہئے۔ یادو نے کہا کہ سماج وادی پارٹی نے سوشل میڈیا کے ذریعہ الیکشن کمیشن سے شکایت کی کہ کچھ بوتھوں پر سیکٹر مجسٹریٹ اشونی کمار اور چوکی انچارج کھنڈاسا انوراگ پاٹھک و پریزائڈنگ افسر نے مل کر ووٹنگ کو متاثر کیا۔ ملکی پور اسمبلی ضمنی الیکشن میں کئی پولنگ سنٹروں پر سماج وادی پارٹی کے ایجنٹوں کو یا تو باہر کردیا گیا یا ایجنٹ ہی نہیں بنایا گیا۔ زیادہ تر بوتھوں پر ای وی ایم خراب ہونے کی شکایات ملیں۔ ای وی ایم تو کئی جگہ خراب رہیں لیکن کٹیا امانی گنج کی 2گھنٹے سے زیادہ مشین خراب رہی اور ووٹنگ رکی رہی۔پرچی کے باوجود کئی مقامات پر ووٹروں کو ووٹ نہیں ڈالنے دیا گیا۔ مسلم خواتین کو برقع ہٹا کر ان کی شناخت کرنے کے بہانے انہیں خائف اور رسوا کیا گیا۔ انہوں نے کہا کہ بی جے پی نے الیکشن عمل کو تباہ کردیا ہے۔ وہ جمہوریت کا قتل کرنے پر آمادہ ہے۔ بی جےپی حکومت اور انتظامیہ نے کھلے عام الیکشن عمل کا اغوا کرلیا ہے۔ ضمنی الیکشن صرف خانہ پری بن کر رہ گیا ہے۔ حکومت کے افسر، ملازمین کھلے عام فرضی ووٹنگ کررہے ہیں۔ سماج وادی پارٹی کے حامی ووٹروں کو ووٹ نہیں ڈالنے دیا گیا۔ یادو نے کہا کہ بی جے پی کو الیکشن میں ہار کا اتنا ڈر ہے کہ بغیر کسی شرم کے کھل کر ووٹوں کی لوٹ کی۔ ملکی پور میں پولیس نے اپنے حق اور دائرے سے باہر جاکر سماج وادی پارٹی کے ووٹروں کو ڈرانے اور فرضی ووٹنگ کرانے میں کوئی تامل نہیں کیا۔ پولیس کے بڑے افسران نے بھی ووٹروں کا شناختی کارڈ چیک کیا۔ بالواسطہ طور سے ووٹروں میں خوف پیدا کرکے ووٹنگ کے عمل کو متاثر کرنے کا جمہوری جرم کیا گیا۔تمام شکایات کے بعد بھی بی جے پی جمہوری عمل کی پاکیزگی کو تار تار کرنے سے باز نہیں آئی۔

Source: uni news