ملک میں گیس بحران میں بڑی راحت ،92 ہزار 700 میٹرک ٹن ایل پی جی لے کر “شیوالک” ٹینکر گجرات پہنچ گیا

مغربی ایشیا میں جاری جنگ کے باعث بھارت میں پیدا ہونے والی ایل پی جی کی قلت کے درمیان ایک بڑی راحت کی خبر سامنے آئی ہے۔ 92 ہزار 700 میٹرک ٹن ایل پی جی لے کر آنے والا ٹینکر شیوالک پیر کے روز گجرات کے ساحل پر واقع مُندرا پورٹ پہنچ گیا۔ اس بڑی کھیپ کی آمد سے ملک بھر میں گیس کے لیے پریشان کروڑوں صارفین کو بڑی راحت ملنے کی امید ہے۔ مغربی ایشیا میں کشیدگی کے سبب آبنائے ہرمز کی صورتِ حال کافی کشیدہ ہو گئی تھی۔ تاہم ایل پی جی سے بھرا ہوا ’’شیوالک‘‘ ٹینکر 14 مارچ کو بحفاظت اس اہم آبی گزرگاہ کو عبور کرنے میں کامیاب رہا اور اب گجرات کے ساحل تک پہنچ گیا ہے۔ اس پیش رفت پر بھارتی حکام اور مرکزی حکومت نے اطمینان کا اظہار کیا ہے۔ اطلاعات کے مطابق اسرائیل اور امریکہ کی کارروائیوں کے بعد ایران نے آبنائے ہرمز کو بند کرنے کا اعلان کیا تھا، تاہم ایران نے بھارتی جہازوں کو خصوصی اجازت دی۔ ایران کے وزیر خارجہ نے بھارت کو اپنا دوست قرار دیتے ہوئے ایل پی جی ٹینکروں کو گزرنے کی اجازت دی، جس کے نتیجے میں یہ ٹینکر بحفاظت آگے بڑھ سکا۔ دریں اثنا حکام نے بتایا کہ ایک اور بڑا ایل پی جی ٹینکر نندا دیوی بھی بھاری مقدار میں گیس لے کر جلد بھارت پہنچنے والا ہے۔ بندرگاہوں کے محکمے کے خصوصی سکریٹری کے مطابق پچھلے 24 گھنٹوں کے دوران خلیج فارس میں موجود بھارتی جہازوں پر کسی قسم کا حملہ نہیں ہوا اور تمام جہاز محفوظ ہیں۔ انہوں نے مزید بتایا کہ اس وقت 24 بھارتی جہاز آبنائے ہرمز کے مغربی حصے میں موجود ہیں۔ ان میں سے ’’شیوالک‘‘ اور ’’نندا دیوی‘‘ ایل پی جی سے بھرے جہاز بحفاظت ہرمز عبور کر کے بھارت کی طرف روانہ ہو چکے ہیں جبکہ باقی 22 جہاز بھی جلد بھارتی ساحلوں تک پہنچنے کی توقع ہے۔ اس پیشرفت کے بعد امید ظاہر کی جا رہی ہے کہ ملک کے مختلف علاقوں میں پیدا ہونے والی ایل پی جی کی قلت میں جلد کمی آئے گی اور عوام کو گیس کی فراہمی دوبارہ معمول پر آ جائے گی۔

Source: social media