ملک بھر میں سخت سیکورٹی کے درمیان منائی جا رہی عید الاضحیٰ، مسجدوں میں نمازیوں کی امڈی بھیڑ

ملک بھر میں آج عیدالاضحیٰ (بقرعید) کا مقدس تہوار انتہائی جوش و خروش اور بھائی چارے کے ساتھ منایا جا رہا ہے۔ مسلمان صبح سویرے عیدگاہوں، مساجد اور کھلے میدانوں میں جمع ہو کر نماز ادا کر رہے ہیں۔ اس موقع پر انتظامیہ کی جانب سے سکیورٹی کے سخت انتظامات کیے گئے ہیں۔ پولیس، نیم فوجی دستوں، ڈرون اور سی سی ٹی وی کی مدد سے نگرانی کی جا رہی ہے تاکہ تہوار پرامن طریقے سے منایا جا سکے۔ دہلی سے لے کر اتر پردیش کے مختلف اضلاع تک نمازیوں کا بھاری ہجوم دیکھا گیا۔ پرانی دہلی کی فتح پوری مسجد میں عیدالاضحیٰ (بقرعید) کے موقع پر خصوصی نماز ادا کی گئی۔ وہیں بلیا میں بہیڑی عیدگاہ پر سینکڑوں لوگ بقرعید کی نماز کے لیے جمع ہوئے۔ مقامی پولیس نے سیکورٹی انتظامات کو برقرار رکھنے کے لیے مناسب فورس تعینات کی۔ مرادآباد میں عیدگاہ پر صبح سے ہی بڑی تعداد میں لوگ پہنچ گئے۔ ادھر، عید کے موقع پر سنبھل ضلع کے چندوسی میں چھوٹی عیدگاہ میں لوگوں نے نماز ادا کی۔ نوئیڈا کے سیکٹر-8 کی مسجد پر پولیس مکمل طور پر الرٹ موڈ پر رہی۔ مہاراج گنج میں عیدگاہوں اور اہم راستوں پر سخت سکیورٹی تعینات کی گئی۔ عقیدت مند پرامن طریقے سے نماز ادا کر رہے ہیں۔ ہردوئی کے بلگرام چونگی عیدگاہ پر بڑی تعداد میں لوگ پہنچے۔ مغربی بنگال کے ضلع ندیہ کے شانتی پور میں عیدالاضحیٰ کی نماز میں بڑی تعداد میں عقیدت مند شریک ہوئے۔ یہاں بھی پرامن ماحول میں نماز ادا کی گئی۔ عیدالاضحیٰ (بقرعید) کے موقع پر، بھوپال کی عیدگاہ میں عقیدت مندوں کے ایک بہت بڑے ہجوم نے نماز ادا کی۔ مبئی میں بقرعید کی صبح بڑی تعداد میں نمازی گھروں سے نکلے۔ اگڑی پاڑہ میں واقع وائی ایم سی اے گراؤنڈ میں ہزاروں لوگ جمع ہوئے اور باجماعت عید کی نماز ادا کی۔ ماہیم درگاہ پر بھی بقرعید کی پہلی نماز میں بھاری ہجوم رہا۔ ممبئی پولیس نے پورے شہر میں سیکورٹی کے سخت انتظامات کیے۔ قابل ذکر ہے کہ ملک کے کونے کونے میں اس مقدس تہوار کو امن اور ہم آہنگی کے ساتھ منایا جا رہا ہے۔ مختلف برادریوں کے لوگ ایک دوسرے کو عید کی مبارکباد دے رہے ہیں۔ انتظامی حکام نے اپیل کی ہے کہ تمام شہری افواہوں سے بچیں اور تہوار کو خوشی خوشی منائیں۔

Source: social media