مغربی ایشیا بحران: تیل اور گیس کی فراہمی کے بحران کے درمیان جے شنکر نے ایرانی وزیر خارجہ سے بات کی

وزیر خارجہ ایس جے شنکر نے منگل کو اپنے ایرانی ہم منصب سید عباس عراقچی سے فون پر بات کی۔ یہ بات چیت مغربی ایشیا میں خاص طور پر توانائی کی فراہمی کے بحران کے بارے میں بڑھتے ہوئے خدشات کے درمیان ہوئی۔ جے شنکر کی عراقچی کے ساتھ منگل کو تیسری بار کال تھی جب انہوں نے ایران پر امریکی اور اسرائیل کے مشترکہ فوجی حملوں کے بعد ان سے بات کی تھی۔ یہ گفتگو ایسے وقت میں ہوئی ہے جب آبنائے ہرمز کو لے کر کشیدگی عروج پر ہے۔ دنیا بھر میں تیل اور گیس کی قیمتیں آسمان چھو رہی ہیں۔ جے شنکر نے ایکس پر لکھا : ایرانی وزیرِ خارجہ عراقچی سے طویل بات چیت ہوئی ہے۔ ایران بحران کی وجہ سے پیدا ہونے والے حالات پر گفتگو ہوئی۔ ہم مسلسل بات چیت جاری رکھنے پر متفق ہوئے ہیں۔ ہندوستان فوری طور پر اس جنگ کا خاتمہ چاہتا ہے کیونکہ توانائی کی سیکورٹی خطرے میں پڑ رہی ہے۔ گیس اور تیل کے حوالے سے بحران بنا ہوا ہے۔ اسی لیے ہندوستان ہر ممکن کوشش کر رہا ہے کہ جنگ ختم ہو جائے۔ اس سے کچھ دیر پہلے روسی صدر نے ایران کے صدر مسعود پیزشکیان سے رابطہ کیا تھا۔ ایک ہفتے کے اندر پوتن اور پیزشکیان کے درمیان یہ دوسری گفتگو ہے۔ یہ سرگرمی ظاہر کرتی ہے کہ پوتن اب اس جنگ کو مزید طول دینے کے حق میں نہیں ہیں کیونکہ اس کا اثر اب براہِ راست عالمی معیشت اور روس کے اپنے مفادات پر پڑ رہا ہے۔

Source: social media