مہاراشٹر میں 'پشپا 3.0' کا منظر: سیلابی پانی میں بہتے ہزاروں ایل پی جی سلنڈر، پتل گنگا ندی میں خوف کا ماحول

ممبئی: مہاراشٹر میں جاری موسلا دھار بارش نے جہاں عام زندگی کو درہم برہم کر دیا ہے، وہاں ایک ایسا حیرت انگیز اور خوفناک منظر بھی سامنے آیا ہے جس نے فلم 'پشپا' میں پانی میں تیرتے چندن کے لٹھوں کی یاد تازہ کر دی۔ رائے گڑھ ضلع میں واقع 'ایچ پی سی ایل پتل گنگا ایل پی جی بوٹلنگ پلانٹ' میں سیلاب کا پانی داخل ہونے کی وجہ سے تقریباً 3,000 گیس سلنڈر (بھرے اور خالی) پتل گنگا ندی کے تیز بہاؤ میں بہہ گئے۔ اس واقعے کے بعد مقامی انتظامیہ اور پولیس متحرک ہو گئی ہے۔ رائے گڑھ کے ضلع کلکٹر کشن جوالے نے صورتحال کی سنگینی کو دیکھتے ہوئے ندی کے کنارے آباد بستیوں اور عام لوگوں کے لیے ایک ہنگامی ایڈوائزری جاری کی ہے۔ انہوں نے شہریوں سے پرزور اپیل کی ہے کہ گھر لے جانے پر پابندی: ندی کے کناروں یا ساحل پر بہہ کر آنے والے کسی بھی سلنڈر کو اٹھا کر اپنے گھر نہ لے جائیں۔ حفاظت کی کوئی گارنٹی نہیں: کلکٹر کے مطابق، یہ واضح نہیں ہے کہ پانی میں بہنے والے سلنڈروں میں گیس کی کیا صورتحال ہے اور کیا وہ محفوظ ہیں یا ان میں لیکیج ہو رہا ہے۔ محض تجسس یا مفت گیس کے استعمال کی لالچ میں انہیں چھونا یا کھولنے کی کوشش کرنا کسی بڑے حادثے کا سبب بن سکتا ہے اور یہ انتہائی خطرناک ہے۔ اس واقعے کی ویڈیوز سوشل میڈیا پر وائرل ہونے کے بعد صارفین کی جانب سے مختلف ردعمل سامنے آ رہے ہیں ایکس (سابقہ ٹوئٹر) پر ونود پٹیل نامی ایک صارف نے ویڈیو شیئر کرتے ہوئے اسے "پشپا 3.0" کا نام دیا اور لکھا کہ سیلاب کے تیز کرنٹ کی وجہ سے ہزاروں سلنڈر بہہ رہے ہیں۔ ایک اور صارف نے اسے صرف قدرتی آفت ماننے سے انکار کرتے ہوئے انتظامیہ اور ایچ پی سی ایل کمپنی کو آڑے ہاتھوں لیا۔ صارف کا کہنا تھا: "یہ عوامی انفراسٹرکچر اور حفاظتی منصوبہ بندی کی کھلی ناکامی ہے۔ ہائی پریشر گیس سے بھرے سلنڈر دیہاتوں کی طرف بہہ رہے ہیں اور انتظامیہ صرف یہ کہہ رہی ہے کہ 'انہیں مت چھونا'۔ ایک اتنے بڑے پبلک سیکٹر یونٹ کی لاپرواہی کا خمیازہ عام عوام کیوں بھگتے؟ یہ عوامی تحفظ کے لیے ایک سنگین خطرہ ہے۔" حکام کا کہنا ہے کہ کمپنی کے عملے اور ریسکیو ٹیموں کی مدد سے ندی میں بہنے والے سلنڈروں کو محفوظ طریقے سے واپس نکالنے کا کام شروع کر دیا گیا ہے، تاہم مہم کے مکمل ہونے تک عوام کو محتاط رہنے کی ہدایت کی گئی ہے۔

Source: Social Media