معروف کامیڈین اور اداکار راج پال یادو کے لیے آگے آئے تیج پرتاپ یادو، لالو پرساد یادو کے بیٹے نے کی 11 لاکھ روپے کی مالی مدد

نئی دہلی: چیک باؤنس کیس میں دہلی کی تہاڑ جیل میں بند بالی ووڈ کے معروف کامیڈین اور اداکار راج پال یادو کے لیے اب سیاسی حلقوں سے بھی مدد سامنے آنے لگی ہے۔ راشٹریہ جنتا دل کے سربراہ لالو پرساد یادو کے بیٹے اور جن شکتی جنتا دل کے قومی صدر تیج پرتاپ یادو نے اداکار کے اہل خانہ کو 11 لاکھ روپے کی مالی امداد فراہم کی ہے۔ اس سے قبل فلم اداکار سونو سود بھی راج پال یادو کی حمایت میں سامنے آ چکے ہیں اور انہوں نے ان کی مدد کا اعلان کیا تھا۔ راج پال یادو اس وقت دہلی ہائی کورٹ کے حکم کے بعد تہاڑ جیل میں بند ہیں۔ عدالت نے چیک باؤنس معاملے میں انہیں سرنڈر کرنے کا حکم دیا تھا، جس پر عمل کرتے ہوئے اداکار کو جیل جانا پڑا۔ جیل جانے سے قبل ایک انٹرویو میں راج پال یادو نے کہا تھا کہ اس وقت نہ ان کے پاس پیسے ہیں اور نہ ہی کوئی مضبوط سہارا اور انہیں اس قانونی لڑائی کا سامنا خود ہی کرنا ہوگا۔ ان کے اس بیان کے بعد فلم انڈسٹری اور عوامی سطح پر ہمدردی کا اظہار شروع ہو گیا۔ اسی دوران بالی ووڈ اداکار سونو سود نے مسیحا بن کر ان کا ساتھ دیا اور راج پال یادو کے حق میں آواز بلند کی۔ سونو سود نے نہ صرف ان کی حالت پر افسوس ظاہر کیا بلکہ فلم انڈسٹری کو بھی یہ سوچنے پر مجبور کیا کہ مشکل وقت میں اپنے ساتھیوں کا ساتھ دینا کتنا ضروری ہے۔ سونو سود نے سوشل میڈیا کے ذریعے یہ بھی اعلان کیا کہ راج پال یادو ان کی اگلی فلم کا حصہ ہوں گے اور انہیں سائننگ اماؤنٹ بھی دیا جائے گا۔ اب اسی سلسلے کو آگے بڑھاتے ہوئے تیج پرتاپ یادو نے بھی راج پال یادو کے خاندان کی مدد کا فیصلہ کیا ہے۔ تیج پرتاپ یادو نے اپنے ایکس ہینڈل پر ایک جذباتی پیغام شیئر کیا۔ انہوں نے لکھا کہ انہیں اپنے بڑے بھائی راؤ اندرجیت یادو کی پوسٹ کے ذریعے راج پال یادو کے خاندان کی تکلیف کے بارے میں معلوم ہوا۔ انہوں نے کہا کہ اس انتہائی مشکل وقت میں وہ اور ان کی پوری جن شکتی جنتا دل پارٹی راج پال یادو کے غمزدہ خاندان کے ساتھ پوری ہمدردی اور مضبوطی سے کھڑی ہے۔ تیج پرتاپ یادو نے اپنی پوسٹ میں مزید لکھا کہ انسانی ہمدردی اور تعاون کے جذبے کے تحت وہ جن شکتی جنتا دل کی جانب سے راج پال یادو کے خاندان کو 11 لاکھ روپے کی مالی امداد فراہم کر رہے ہیں۔ سیاسی ذرائع کے مطابق یہ پہلی بڑی مالی مدد ہے جو کسی سیاست دان کی طرف سے اداکار کے لیے سامنے آئی ہے، جس پر سوشل میڈیا پر بھی خاصی چرچا ہو رہی ہے۔ راج پال یادو جس معاملے میں جیل گئے ہیں، اس کی شروعات سال 2010 میں ہوئی تھی۔ اس دوران انہوں نے فلم ’’اتا پتا لاپتا‘‘ کی ہدایت کاری کی تھی۔ فلم کی تیاری کے لیے انہوں نے مرلی پروجیکٹس پرائیویٹ لمیٹڈ سے تقریباً پانچ کروڑ روپے کا قرض لیا تھا۔ بدقسمتی سے فلم باکس آفس پر بری طرح ناکام رہی اور اداکار یہ رقم واپس نہ کر سکے۔ بعد ازاں پروڈکشن کمپنی نے راج پال یادو کے خلاف قانونی کارروائی شروع کی اور الزام لگایا کہ ادائیگی کے لیے دیا گیا چیک بھی باؤنس ہو گیا۔ معاملہ عدالت تک پہنچا، جہاں اداکار کو کئی نوٹس جاری کیے گئے اور قسطوں میں رقم ادا کرنے کا موقع بھی دیا گیا، مگر وہ ادائیگی نہیں کر سکے۔ وقت گزرنے کے ساتھ سود اور دیگر واجبات کے باعث یہ رقم بڑھ کر تقریباً نو کروڑ روپے تک پہنچ گئی، جس کے نتیجے میں انہیں جیل جانا پڑا۔

Source: social media