معروف امریکی پاپ گلوکارہ بیونسے ارب پتی افراد کی فہرست میں شامل ہوگئیں

معروف امریکی پاپ گلوکارہ بیونسے ارب پتیوں کی فہرست میں شامل ہونے والی پانچویں موسیقار بن گئیں۔ دنیا بھر میں کوئین بی کے نام سے مشہور امریکی سپر اسٹار بیونسے نولز کارٹر نے ایک اور بڑی کامیابی اپنے نام کر لی، معروف بزنس میگزین فوربز نے بیونسے کو باضابطہ طور پر ارب پتی شخصیات کی فہرست میں شامل کر لیا ہے۔ فوربز کی رپورٹ کے مطابق امیر ترین موسیقاروں کی فہرست میں بروس اسپرنگزٹین، ریحانہ، ٹیلر سوئفٹ اور جے زیڈ شامل ہیں۔ فوربز کی رپورٹ کے مطابق 44 سالہ بیونسے نے 2025 میں اپنی کامیاب کاؤ بوائے کارٹر ٹور مکمل کی، جس نے 407 ملین ڈالر سے زائد کی ریکارڈ کمائی کی، یہ ٹور ان کے 2024 میں ریلیز ہونے والے میگا ہٹ اسٹوڈیو البم کاؤ بوائے کارٹر کے بعد شروع کیا گیا تھا، جسے عالمی سطح پر بےپناہ پذیرائی ملی۔ ماہرین کے مطابق 2025 میں بیونسے کی مجموعی دولت 1 ارب ڈالر سے تجاوز کر چکی ہے، جس کی بڑی وجوہات میں ٹورنگ، میوزک کیٹلاگ رائلٹیز اور اشتہاری معاہدوں سے حاصل ہونے والی 148 ملین ڈالر سے زائد آمدن شامل ہے۔

Source: social media