ایل پی جی کے بعد پی این جی بھی مہنگی، آئی جی ایل نے قیمتوں میں اضافہ کیا

نئی دہلی: مغربی ایشیا کے بحران کی وجہ سے کھانا پکانے والی گیس (ایل پی جی) کے بعد اب پائپ لائن کے ذریعہ کچن تک آنے والی قدرتی گیس (پی این جی) کی قیمت بھی بڑھ گئی ہے۔ دہلی-این سی آر کے ساتھ کانپور، میرٹھ، اجمیر جیسے کئی شہروں میں گھروں میں پی این جی فراہم کرنے والی کمپنی اندرا پرستھ گیس لمیٹڈ (آئی جی ایل) نے یکم اپریل سے پی این جی کی قیمت بڑھا کر دہلی میں 49.59 روپے فی معیاری کیوبک میٹر (ایس سی ایم) کردیا ہے۔ اس سے پہلے یک جنوری 2026 سے اس کی قیمت 47.89 روپے فی ایس سی ایم تھی۔ اسی طرح قومی دارالحکومت میں پی این جی 1.70 روپے فی ایس سی ایم مہنگی ہوگئی ہے۔ این سی آر کے دیگر شہروں میں بھی قیمت میں 1.70 روپے فی ایس سی ایم کا اضافہ کیا گیا ہے، جب کہ دیگر شہروں میں پی این جی 1 روپے مہنگی ہو گئی ہے۔ نوئیڈا، گریٹر نوئیڈا، اور غازی آباد میں، پی این جی کے ایک ایس سی ایم کی قیمت 47.76 روپے سے بڑھا کر 49.46 روپے کردی گئی ہے۔ مظفر نگر، میرٹھ اور شاملی میں اس کی قیمت 47.35 روپے سے بڑھا کر 48.35 روپے، اجمیر، پالی، اور راجسمند میں 47.27 روپے سے بڑھاکر 48.27 اور کانپور، فتح پور، ہمیر پور، اور چترکوٹ میں 47.95 سے بڑھا کر 48.95 روپے کردی گئی ہے۔ دیگر شہروں میں بھی قیمتوں میں اسی طرح کا اضافہ دیکھا گیا ہے۔ مغربی ایشیا کا بحران شروع ہونے کے بعد 7 مارچ کو گھریلو ایل پی جی سلنڈر کی قیمت 60 روپے بڑھائی گئی تھی۔ دریں اثنا، کمرشل ایل پی جی سلنڈر کی قیمت یکم مارچ، سات مارچ اور یکم اپریل کو تین بار میں 338 روپے بڑھ چکی ہے۔

Source: social media