کیرالا کے رکنِ اسمبلی راجو کو شواہد سے چھیڑ چھاڑ کے معاملے میں تین سال قید

تروواننت پورم، 3 دسمبر : کیرالہ کے سابق وزیرِ ٹرانسپورٹ اور تروواننت پورم سے موجودہ رکنِ اسمبلی اینٹنی راجو کو شواہد سے چھیڑ چھاڑ کے ایک معاملے میں ہفتہ کے روز تین سال قید کی سزا سنائی گئی۔ نیدومنگد کی جوڈیشل فرسٹ کلاس مجسٹریٹ عدالت نے 1990 کے اس معاملے میں رکنِ اسمبلی پر جرمانہ بھی عائد کیا۔ اس کے ساتھ ہی ان کے شریکِ ملزم کے ایس جوز کو بھی اتنی ہی سزا سنائی گئی۔ اس معاملے کی شروعات چار اپریل 1990 کو تروواننت پورم ہوائی اڈے پر ایک آسٹریلیائی شہری کی گرفتاری سے ہوئی تھی۔ اس شخص پر الزام تھا کہ وہ اپنے انڈر ویئر میں منشیات چھپا کر اسمگلنگ کر رہا تھا۔ انڈر ویئر ضبط کر کے ایک اہم ثبوت کے طور پر عدالت میں پیش کیا گیا تھا۔ استغاثہ کے مطابق، اُس وقت وکیل کے طور پر کام کر رہے اینٹنی راجو نے عدالت کے ایک ملازم کے ساتھ مل کر اس انڈر ویئر کو غیر قانونی طور پر عدالت سے غائب کر دیا اور اس کے ساتھ چھیڑ چھاڑ کی۔ چھیڑ چھاڑ کے بعد ہی اس ثبوت کو اپیل کی کارروائی کے دوران عدالت کے سامنے پیش کیا گیا تھا۔ اپیل کی سماعت کے دوران وہ انڈر ویئر ملزم کو فِٹ نہیں آیا، جس سے مقدمے پر سنگین شبہات پیدا ہوئے اور ملزم کو بری کر دیا گیا۔ استغاثہ نے دلیل دی کہ یہ چھیڑ چھاڑ جان بوجھ کر کی گئی تھی اور اس کا مقصد انصاف کے عمل میں رکاوٹ ڈالنا تھا۔ زبانی اور دستاویزی شواہد کا جائزہ لینے کے بعد ٹرائل کورٹ نے مانا کہ مجرمانہ سازش، شواہد کو غائب کرنا، جھوٹے شواہد بنانا اور مجرمانہ خیانت کے الزامات بلا کسی شک کے ثابت ہو گئے ہیں۔ یہ معاملہ کئی برسوں تک التوا کا شکار رہا۔ سپریم کورٹ کی ہدایات کے بعد فیصلے جلد سنائے کے لئے اسے دوبارہ شروع کیا گیا۔

Source: uni news