کیرالہ اور دیگر ریاستوں میں ایس آئی آر کے عمل کو چیلنج

نئی دہلی: سپریم کورٹ نے جمعہ کو کیرالہ، اتر پردیش اور دیگر ریاستوں میں اسپیشل انٹینسیو ریویژن مشق کرنے کے الیکشن کمیشن کے فیصلے کو چیلنج کرنے والی درخواستوں پر سماعت کرنے پر اتفاق کیا۔ جسٹس سوریہ کانت، ایس وی این بھٹی اور جویمالیا باغچی پر مشتمل بنچ نے الگ الگ سیاسی رہنماؤں کی طرف سے مختلف بنیادوں پر مختلف ریاستوں میں ایس آئی آر کی مشق کو چیلنج کرنے والی تمام نئی درخواستوں پر الیکشن کمیشن کو نوٹس جاری کیا۔ سینئر ایڈواکیٹ کپل سبل نے، کیرالہ میں ایس آئی آر مشق کو چیلنج کرنے والے ایک عرضی گزار کی نمائندگی کرتے ہوئے کہا کہ ریاست میں بلدیاتی انتخابات بھی شیڈول ہیں اور اس لیے اس معاملے میں کچھ عجلت ہے۔ بنچ نے ہدایت دی کہ کیرالہ میں ایس آئی آر مشق کو چیلنج کرنے والی درخواستوں کو 26 نومبر کو درج کیا جائے گا اور دیگر ریاستوں میں ووٹر لسٹ پر نظرثانی کی مشق کو چیلنج کرنے والی بقیہ درخواستوں کی سماعت دسمبر کے پہلے یا دوسرے ہفتے میں کی جائے گی۔ واضح رہے کہ سپریم کورٹ پہلے ہی ہندوستان بھر میں ایس آئی آر مشق کرنے کے الیکشن کمیشن کے فیصلے کی قانونی حیثیت کو چیلنج کرنے والی متعدد درخواستوں کی سماعت کر رہی ہے۔

Source: social media