کرور بھگدڑ معاملے میں اداکار وجے چندر شیکھر سے سی بی آئی نے تقریباً 7 گھنٹے تک کی تفتیش

نئی دہلی: اداکار اور تملاگا ویٹری کژگم کے سربراہ وجے چندرشیکھر سے پیر کے روز کرور بھگدڑ معاملے میں سی بی آئی ہیڈکوارٹرز میں تقریباً سات گھنٹے تک پوچھ گچھ کی گئی۔ ذرائع کے مطابق، یہ پوچھ گچھ ستمبر میں تمل ناڈو کے ضلع کرور میں پیش آنے والے اس افسوسناک واقعے سے متعلق تھی، جس میں 41 افراد جاں بحق اور 100 سے زائد زخمی ہوئے تھے۔ ذرائع کے مطابق، پوچھ گچھ کے دوران وجے نے مؤقف اختیار کیا کہ کرور میں پیش آنے والی بھگدڑ کے لیے نہ تو ان کی پارٹی اور نہ ہی پارٹی کے کسی عہدیدار کو ذمہ دار ٹھہرایا جا سکتا ہے۔ یہی موقف اس سے قبل پارٹی کے دیگر عہدیداران بھی اپنا چکے ہیں، جن سے سی بی آئی نے پہلے ہی تفتیش کی ہے۔ ذرائع نے بتایا کہ وجے کے بیان کا تجزیہ کیا جائے گا اور اسے پولیس اہلکاروں کے بیانات سے ملایا جائے گا۔ پولیس حکام نے پہلے یہ بیان دیا تھا کہ پروگرام کے دوران وجے کی جانب سے تاخیر بھگدڑ کی ایک وجہ بنی۔ وجے نے سی بی آئی کو یہ بھی بتایا کہ انہوں نے موقع سے اس لیے روانگی اختیار کی کیونکہ انہیں خدشہ تھا کہ ان کی موجودگی سے بدنظمی اور ہنگامہ آرائی بڑھ سکتی ہے۔ حکام کے مطابق، سی بی آئی وجے کو مزید پوچھ گچھ کے لیے دوبارہ طلب کر سکتی ہے۔ تاہم، وجے نے منگل کے روز پونگل تہوار کے باعث پیشی سے استثنیٰ طلب کیا ہے، جس کے بعد ایجنسی انہیں کسی اور تاریخ پر بلا سکتی ہے۔ اب تک سی بی آئی وجے کی پارٹی کے متعدد افراد اور تمل ناڈو پولیس کے اہلکاروں سے پوچھ گچھ کر چکی ہے۔ اکتوبر 2025 میں سپریم کورٹ کے حکم کے بعد سی بی آئی نے یہ تفتیش تمل ناڈو پولیس سے اپنے ہاتھ میں لی تھی۔ ایجنسی نے اس سیاسی پروگرام کے دوران پیش آنے والی بھگدڑ کے تمام حالات کا باریک بینی سے جائزہ لینا شروع کر دیا ہے۔ سی بی آئی نے اس سے قبل وجے کو بھارتیہ ناگرک سرکشا سنہتا کی دفعہ 179 کے تحت نوٹس جاری کیا تھا، جس میں انہیں پوچھ گچھ کے لیے پیش ہونے کی ہدایت دی گئی تھی۔ یہ نوٹس رواں ماہ جاری کیا گیا تھا اور سمن کی تاریخ 6 جنوری درج تھی۔ یہ معاملہ 27 ستمبر 2025 کو تمل ناڈو کے ضلع کرور میں ٹی وی کے کی انتخابی مہم کے دوران پیش آنے والی بھگدڑ سے متعلق ہے۔ تحقیقات کے دوران پارٹی قائدین نے سی بی آئی کو ویڈیو فوٹیج بھی فراہم کی ہے اور تمل ناڈو حکومت کی جانب سے کوتاہیوں کا الزام لگایا ہے۔ سی بی آئی نے مہم کے دوران استعمال ہونے والی وجے کی گاڑی کا بھی معائنہ کیا اور ڈرائیور سے پوچھ گچھ کی ہے۔ کرور بھگدڑ کے واقعے نے پورے ملک میں شدید عوامی غم و غصے کو جنم دیا تھا، جس کے بعد عدالتی اور قانونی سطح پر اس کی گہری جانچ شروع کی گئی۔

Source: social media