کرناٹک کے تمام طلبہ کو مفت بس پاس دیے جائیں گے : وزیرِ اعلیٰ شیوکمار

بنگلورو، 3 جون:) کرناٹک کے نومنتخب وزیرِ اعلیٰ ڈی کے شیوکمار نے بدھ کے روز اعلان کیا کہ ریاست کے تمام طلبہ کو مفت بس پاس فراہم کیے جائیں گے ۔کابینہ اجلاس کے بعد صحافیوں سے گفتگو کرتے ہوئے وزیرِ اعلیٰ نے کہا کہ اس فیصلے کے دائرے میں پی یو سی، ڈگری کالجوں، پوسٹ گریجویٹ کورسز اور دیگر تعلیمی اداروں کے تمام طلبہ شامل ہوں گے ۔ اس سہولت سے فائدہ اٹھانے کے لیے طلبہ کو درخواست کے ذریعے اپنی شناخت کی تصدیق کرانی ہوگی۔ انہوں نے کہا، ''ہماری کوشش ہے کہ سفر کے اخراجات کسی بھی طالب علم کی تعلیم میں رکاوٹ نہ بنیں۔'' ان کے مطابق اس اقدام سے تعلیم تک رسائی مزید آسان ہوگی اور خاندانوں پر مالی بوجھ میں کمی آئے گی۔ وزیرِ اعلیٰ نے حکومت کے وسیع تر ترقیاتی منصوبوں کا خاکہ پیش کرتے ہوئے بتایا کہ مختلف سرکاری محکموں میں خالی پڑے 56 ہزار عہدوں کو پُر کیا جائے گا۔ بھرتی کے عمل میں شفافیت اور نظم و ضبط لانے کے لیے جلد ہی ایک جامع بھرتی کیلنڈر جاری کیا جائے گا۔ انہوں نے مزید کہا کہ نوجوانوں کو روزگار کے بہتر مواقع فراہم کرنے کے لیے سرکاری اور نجی شعبے کی ملازمتوں کو یکجا کرتے ہوئے ایک بڑے روزگار سہولت نظام کا آغاز کیا جائے گا، جس میں مہارتوں کے مطابق روزگار فراہم کرنے کا نظام بھی شامل ہوگا۔ ایک اور اہم فیصلے کے تحت حکومت نے پنچایتوں اور شہری وارڈوں میں 10 ہزار نوجوان تنظیمیں قائم کرنے کا اعلان کیا ہے ۔ کھیل، ثقافتی سرگرمیوں، قیادت سازی اور سماجی ہم آہنگی کو فروغ دینے کے لیے ہر یونٹ کو 10 لاکھ روپے کی مالی امداد دی جائے گی۔شہری بنیادی ڈھانچے کے حوالے سے شیوکمار نے کہا کہ ''گریٹر بنگلورو اتھارٹی'' کے تحت بنگلورو میں سڑکوں کی ترقی اور بنیادی سہولیات کی بہتری کے لیے 2,000 کروڑ روپے مختص کیے جائیں گے ۔انہوں نے بتایا کہ کابینہ نے بجلی اور پانی کے کنکشن سے متعلق طویل عرصے سے زیرِ التوا مسائل کا بھی جائزہ لیا ہے اور تصدیق شدہ دستاویزات کی بنیاد پر اہل درخواست دہندگان کو یکمشت ریلیف فراہم کرنے کے امکانات پر غور کیا جا رہا ہے ۔ وزیرِ اعلیٰ نے ان فیصلوں کو 'عوام دوست اور مستقبل پر مبنی' قرار دیتے ہوئے کہا کہ حکومت کسانوں، نوجوانوں اور شہری ترقی کو خصوصی ترجیح دے گی اور حکمرانی کے عمل میں اجتماعی فیصلہ سازی کو فروغ دیا جائے گا۔ انہوں نے ذرائع ابلاغ سے بھی اپیل کی کہ قیاس آرائیوں پر مبنی خبروں سے گریز کریں اور صرف حقائق پر مبنی رپورٹنگ کو ترجیح دیں۔

Source: UNI News