کف سیرپ سانحہ: ڈاکٹر کی گرفتاری پر آئی ایم اے کی تنقید، وزیر صحت سے مداخلت کی اپیل

نئی دہلی، 9 اکتوبر: انڈین میڈیکل ایسوسی ایشن (آئی ایم اے ) نے جمعرات کے روز مرکزی وزیر صحت جے پی نڈا کو خط لکھ کر حال ہی میں ہوئے کف سیرپ سانحے کے معاملے میں مدھیہ پردیش کے ایک ڈاکٹر کی گرفتاری کی سخت مذمت کی ہے اور ڈاکٹر کے خلاف تمام قانونی کارروائی فوری طور پر واپس لینے کا مطالبہ کیا ہے ۔ مدھیہ پردیش پولیس نے چھندواڑہ کے سینئر چائلڈ اسپیشلسٹ ڈاکٹر پروین سونی کو کف سیرپ تجویز کرنے کے الزام میں گرفتار کیا ہے ۔ خط میں آئی ایم اے نے لکھا ہے کہ ایک رجسٹرڈ ڈاکٹر اور چائلڈ اسپیشلسٹ کی گرفتاری قانون سے عدم واقفیت کی ایک مثال ہے اور یہ غلط پیغام دیتی ہے ۔ ایسوسی ایشن نے مزید کہا کہ ایسے معاملات میں کسی ڈاکٹر کو دوا میں موجود زہریلے ملاوٹ (ڈائی تھیلین گلائکول) کے لیے ذمہ دار نہیں ٹھہرایا جا سکتا ہے ۔ آئی ایم اے نے وزیر صحت سے اپیل کی کہ وہ اس معاملے میں مداخلت کریں اور کہا کہ ڈاکٹر کے خلاف تمام قانونی کارروائی فوری طور پر واپس لی جائے ۔ ایسوسی ایشن نے کہا کہ بچوں کی غیر متوقع اموات ڈرگ مینوفیکچررز کی کوالٹی کنٹرول کے اقدامات پر عمل درآمد میں ناکامی کا نتیجہ ہیں۔ آخر میں ایسوسی ایشن نے انتظامی اصلاحات پر زور دیتے ہوئے فارماکو ویجیلنس پروگرام کو مضبوط کرنے ، کوالٹی سسٹمز کا جائزہ لینے اور معیار کی خلاف ورزی میں ملوث اداروں کا معائنہ کرنے کی بھی سفارش کی ۔

Source: uni news