انڈیگو پر ڈی جی سی اے کا بڑا قدم، 4 انسپکٹر برطرف، سی ای او کو دوبارہ طلب کیا

نئی دہلی: شہری ہوا بازی کے نگران ادارے ڈی جی سی اے نے انڈیگو ایئرلائن کے حالیہ عملیاتی بحران کے بعد بڑا قدم اٹھاتے ہوئے چار فلائٹ انسپکٹروں کو برطرف کر دیا ہے۔ یہ وہ افسران تھے جن پر انڈیگو کے حفاظتی اور آپریشنل معیار کی نگرانی کی ذمہ داری تھی۔ ادارے نے یہ کارروائی اس وجہ سے کی کہ دسمبر کے آغاز میں انڈیگو نے ہزاروں پروازیں منسوخ کیں، جس کے باعث ملک بھر میں مسافروں کو شدید پریشانی کا سامنا کرنا پڑا۔ ڈی جی سی اے نے انسپکٹرز کی برطرفی کے ساتھ ساتھ انڈیگو کے سی ای او پیٹر ایلبرس کو دوبارہ نوٹس بھیج کر جمعہ کے روز پیش ہونے کی ہدایت کی ہے۔ ذرائع کے مطابق انسپکشن اور مانیٹرنگ ڈیوٹی میں سنگین غفلت پائے جانے کے بعد یہ کارروائی ناگزیر سمجھی گئی۔ نگرانی کے عمل کو مزید سخت کرنے کے لیے ڈی جی سی اے نے انڈیگو کے گڑگاؤں دفتر میں دو خصوصی مانیٹرنگ ٹیمیں تعینات کر دی ہیں، جو روزانہ شام 6 بجے تک اپنی رپورٹ پیش کریں گی۔ پہلی ٹیم ایئرلائن کی آپریشنل اہلیت، بیڑے کی تیاری، پائلٹس و دیگر عملے کی دستیابی، ڈیوٹی شیڈول، ٹریننگ پروگرام، غیر متوقع رخصت، اسٹینڈ بائی عملے اور عملے کی کمی کی وجہ سے متاثر ہونے والی پروازوں کا جائزہ لے رہی ہے۔ یہ ٹیم نیٹ ورک اور اوسط پرواز کے وقت کا بھی تجزیہ کر رہی ہے تاکہ بحران کی مکمل شدت کو سمجھا جا سکے۔ دوسری ٹیم مسافروں کی مشکلات پر توجہ مرکوز کیے ہوئے ہے۔ اس کا کام رِفنڈز کی صورتحال، ٹریول ایجنٹس کے ذریعے کی جانے والی ادائیگیوں کی واپسی، شہری ہوا بازی کے ضابطوں (سی اے آر) کے تحت ملنے والے معاوضے، وقت کی پابندی، سامان کی بروقت فراہمی اور مجموعی منسوخی کے اعداد و شمار کا جائزہ لینا ہے۔ ڈی جی سی اے نے انڈیگو کو حکم دیا ہے کہ وہ اپنے شیڈول کو مستحکم کرنے کے لیے اپنی یومیہ پروازوں میں 10 فیصد کمی کرے۔ چونکہ انڈیگو عام دنوں میں تقریباً 2,200 پروازیں چلاتی ہے، اس حساب سے اب اسے روزانہ 200 سے زائد پروازیں کم کرنی ہوں گی۔ مرکزی ہوا بازی وزیر رام موہن نائڈو نے کہا کہ انڈیگو کے غیر مؤثر روسترنگ، ناقص منصوبہ بندی اور مواصلاتی کمزوریوں کے باعث مسافروں کو "سنگین پریشانی" کا سامنا کرنا پڑا۔ وزیر نے واضح کیا کہ ایئرلائن کو کرایوں کی حد سمیت وزارت کے تمام ہدایات پر سختی سے عمل کرنا ہوگا۔ انڈیگو نے 3 سے 5 دسمبر کے دوران شدید تاخیر کے شکار مسافروں کے لیے معاوضے کا اعلان بھی کیا ہے۔

Source: social media