نشان نہیں ملا تو ممتا بنرجی ضمنی چناﺅ میں انتخابی مہم نہیں چلائیں گی
پوجا سے پہلے ہی ریاست میں انتخابات کی تیاریاں شروع ہو گئی ہیں۔ 6 اکتوبر کو نندی گرام اور ریزینگر میں ضمنی انتخابات ہوں گے۔ ان دونوں حلقوں میں کالی گھاٹ ترنمول کانگریس کی جانب سے انتخابی مہم میں ترنمول کانگریس کی رہنما ممتا بنرجی نظر آئیں گی یا نہیں، یہ سوال گردش کر رہا تھا۔ اسی دوران ممتا بنرجی نے خود اپنا موقف واضح کر دیا ہے! ذرائع کے مطابق پارٹی میٹنگ میں انہوں نے کہا ہے کہ اگر انتخابی نشان نہیں ملا تو وہ انتخابی مہم میں نہیں جائیں گی۔
ترنمول کانگریس کی حکومت کو شکست دے کر ریاست میں اب بی جے پی 207 نشستوں پر اقتدار میں ہے۔ اپوزیشن ترنمول کانگریس کے دونوں گروپوں کے درمیان انتخابی نشان کو لے کر تنازع جاری ہے۔ نشان کے معاملے میں پیچیدگی کے درمیان ضمنی انتخابات میں ترنمول کانگریس کے دونوں گروپ آمنے سامنے ہیں۔ بدھ کے روز ترنمول کانگریس کے دونوں گروپوں کے امیدواروں نے نامزدگی داخل کی۔
ذرائع کے مطابق نامزدگی داخل کرنے سے ایک روز قبل منگل کو ریزینگر کے ترنمول کانگریس امیدوار ربیع الاسلام چودھری ممتا بنرجی سے ملاقات اور ان کی آشیرواد لینے کے لیے کالی گھاٹ گئے تھے۔ بدھ کو نامزدگی داخل کرنے کے بعد صحافیوں کے سوالات کے جواب میں انہوں نے کہا، ”ممتا دیدی نے بتایا ہے کہ جب تک انتخابی نشان کا تنازع حل نہیں ہوتا، وہ انتخابی مہم میں نہیں آئیں گی۔“ ذرائع کے مطابق ضمنی انتخابات کی مہم میں ابھیشیک بنرجی بھی نظر آ سکتے ہیں۔ واضح رہے کہ وہ اس وقت آنکھوں کے علاج کے لیے امریکہ میں ہیں۔
واضح رہے کہ انتخابی نشان کے معاملے پر الیکشن کمیشن پہلے ہی کالی گھاٹ اور ریتبرت، دونوں گروپوں کے ساتھ میٹنگ کر چکا ہے۔ لیکن جڑواں پھول والا انتخابی نشان کس گروپ کو ملے گا، اس بارے میں ابھی تک کوئی فیصلہ نہیں ہوا ہے۔ بدھ کے روز ایک بار پھر دونوں گروپوں کو کچھ معلومات الیکشن کمیشن میں جمع کرانے کی ہدایت دی گئی ہے۔ تاہم کمیشن اس انتخابی نشان کے بارے میں کب فیصلہ کرے گا، یہ کسی بھی گروپ کے لیے واضح نہیں ہے۔ اسی پس منظر میں ذرائع کا کہنا ہے کہ ممتا بنرجی انتخابی نشان یقینی ہوئے بغیر پارٹی کی انتخابی مہم میں جانے کے لیے تیار نہیں ہیں۔
دوسری جانب، ریزینگر حلقے سے ریتبرت گروپ کے امیدوار صفی الزمان شیخ کی نامزدگی کے موقع پر اروپ رائے اور اخروزمان جیسے رہنما بھی نظر آئے۔ وہیں شوبھندو ادھیکاری کے چھوڑے ہوئے نندی گرام حلقے سے ریتو گروپ کے امیدوار محمد احتشام الحق کی نامزدگی کے پروگرام میں مدن مترا اور اسنیہاشیش چکرورتی سمیت دیگر رہنما موجود تھے۔
سیاسی حلقوں کے ایک حصے کے مطابق، دونوں گروپوں کے درمیان انتخابی نشان کو لے کر کشمکش کے دوران جہاں نامزدگی کے موقع پر ریتبرت گروپ کے امیدواروں کے ساتھ پارٹی کے اہم رہنما نظر آئے، وہیں کالی گھاٹ گروپ کے امیدواروں کے معاملے میں پارٹی کی اعلیٰ قیادت کی عدم دلچسپی بھی نظر آئی۔
واضح رہے کہ بدھ کو نندی گرام میں ترنمول کانگریس کے کالی گھاٹ گروپ کی امیدوار سنچیتا ڈے پردھان کی نامزدگی کے موقع پر ضلع کے دیگر رہنماو¿ں میں صرف اکھل گیری موجود تھے۔ گزشتہ روز ہی ہلدیہ میں نندی گرام سے بی جے پی امیدوار کی نامزدگی داخل کراتے ہوئے شوبھندو ادھیکاری نے ترنمول کانگریس کی شکست کا ذکر کرتے ہوئے کہا تھا، ”ضمنی انتخابات میں بھی ترنمول کانگریس کو شکست کا سامنا کرنا پڑے گا۔ ترنمول کانگریس کو 16 فیصد ووٹ بھی نہیں ملیں گے۔“ ناقدین کا سوال ہے کہ کیا انتخابی مقابلے سے پہلے ہی ممتا حامی ترنمول کانگریس نے شکست تسلیم کر لی ہے؟