آواس یوجنا کی رقم سے گھر بنا لیا، اچانک رقم واپس کرنے کا نوٹس، بیر بھوم کے الینور پریشان
ایک طرف سر پر پکی چھت کا خواب، تو دوسری جانب اسی خواب کی تکمیل کے لیے ملنے والی سرکاری رقم ہی واپس کرنے کا حکم۔ بنگال آواس یوجنا کی پہلی قسط کے 60 ہزار روپے واپس کرنے کا نوٹس ملنے کے بعد دوبراج پور بلاک کے لکشمی نارائن پور گرام پنچایت کے آدم پور گاو¿ں کے رہائشی الینور اور ان کے اہل خانہ پریشانی میں مبتلا ہیں۔
حال ہی میں دوبراج پور کے بی ڈی او دفتر سے الینور کے نام ایک نوٹس جاری کیا گیا ہے۔ اس میں کہا گیا ہے کہ بنگال آواس یوجنا کے تحت ان کے بینک اکاو¿نٹ میں پہلی قسط کے 60 ہزار روپے جمع ہوئے تھے۔ لیکن بعد میں ہونے والی جانچ میں انتظامیہ کی جانب سے بتایا گیا کہ وہ اس منصوبے کا فائدہ حاصل کرنے کے اہل نہیں ہیں۔ لہٰذا مذکورہ رقم فوری طور پر بلاک ڈیولپمنٹ آفیسر کے دفتر میں واپس کرنے کی ہدایت دی گئی ہے۔ رقم واپس نہ کرنے کی صورت میں قانونی کارروائی کی بات بھی نوٹس میں کہی گئی ہے۔
اسی ہدایت کو لے کر اصل پیچیدگی پیدا ہوئی ہے۔ الینور کا دعویٰ ہے کہ انتخابات سے قبل ہی آواس یوجنا کے تحت ان کے گھر کی منظوری ہو چکی تھی۔ سرکاری ضابطوں کے مطابق بینک اکاو¿نٹ میں رقم آنے کے بعد انہوں نے اسی رقم سے گھر کی تعمیر شروع کی۔ اب تک گھر کی دیواریں کھڑی کرنے اور چھت ڈالنے کا کام بھی ہو چکا ہے۔ رقم کی کمی کے باعث فی الحال تعمیراتی کام رکا ہوا ہے۔ ایسے میں یہ نوٹس ملنے کے بعد الینور کے خاندان میں تشویش بڑھ گئی ہے۔
خاندان کا کہنا ہے کہ ووٹر فہرست کی نظرثانی کے دوران الینور کا نام حذف ہو گیا تھا۔ ان کا الزام ہے کہ خاندان کے دیگر افراد کے نام ووٹر فہرست میں موجود ہیں اور انہوں نے ووٹ بھی دیا ہے۔ اگر انتظامی غلطی کی وجہ سے الینور کا نام ووٹر فہرست سے حذف ہوا ہے تو اس کی ذمہ داری فائدہ اٹھانے والے پر کیوں ڈالی جائے، خاندان نے یہ سوال اٹھایا ہے۔
خاندان کا دعویٰ ہے کہ انتہائی غریب ہونے کی وجہ سے گھر کی تعمیر میں پہلے ہی خرچ ہو چکے 60 ہزار روپے واپس کرنا ان کے لیے تقریباً ناممکن ہے۔ معاملے پر دوبارہ غور کرنے کی درخواست لے کر انہوں نے بلاک انتظامیہ سے رجوع کیا ہے۔