درگا پوجا میں اجازت نہ ملے تو کالی پوجا میں کتابوں کے اسٹال لگالیں: ہائی کورٹ کا سی پی ایم کو مشورہ
کلکتہ ہائی کورٹ نے پیر کے روز مشورہ دیا کہ سی پی آئی (ایم) کا ثقافتی شعبہ کالی پوجا کے دوران اپنے کتابوں کے اسٹال لگا سکتا ہے۔ عدالت شمالی 24 پرگنہ ضلع کے نیہاٹی اور بنگاو¿ں میں درگا پوجا کے دوران عارضی اسٹال لگانے کی اجازت نہ دیے جانے کے خلاف دائر عرضی کی سماعت کر رہی تھی۔
عرضی گزاروں نے عدالت کو بتایا کہ وہ گزشتہ پانچ دہائیوں سے درگا پوجا کے تہوار کے دوران ان دونوں مقامات پر کتابوں کے اسٹال لگاتے آ رہے ہیں۔ عرضی گزاروں کی جانب سے پیش ہونے والے وکیل شمیم احمد نے کہا کہ اس سال حکام نے ”اعلیٰ حکام کی ہدایت“ کا حوالہ دیتے ہوئے اجازت دینے سے انکار کر دیا۔
عرضی کی سماعت کرتے ہوئے جسٹس سوگت بھٹاچاریہ نے سوال اٹھایا کہ کیا طویل عرصے سے جاری اس روایت کی بنیاد پر عرضی گزاروں کو اسٹال لگانے کا خودکار حق حاصل ہو جاتا ہے؟ جج نے زبانی طور پر مشورہ دیا کہ وہ اس کے بجائے تقریباً دو ہفتے بعد ہونے والی کالی پوجا کے دوران کتابوں کے اسٹال لگانے کا اہتمام کر سکتے ہیں۔
جب عرضی گزار کے وکیل نے معاملے کو ان کی عدالت سے دوسری عدالت میں منتقل کرنے کی درخواست کی تو جسٹس بھٹاچاریہ نے کہا کہ وہ منگل کے روز اس پر غور کریں گے۔
سی پی آئی (ایم) کے ثقافتی شعبے مغربی بنگال بھر میں درگا پوجا کے دوران مختلف پوجا پنڈالوں کے قریب کتابوں کے اسٹال لگاتے ہیں۔
تاہم، گزشتہ ماہ وزیر اعلیٰ سوویندو ادھیکاری نے اس وقت سیاسی تنازع کھڑا کر دیا تھا، جب انہوں نے درگا پوجا کمیٹیوں سے کہا تھا کہ اگر وہ اس تہوار کے لیے ”شارودوتسو“ کی اصطلاح استعمال کرتی ہیں اور اس طرح ”درگا پوجا“ کے مذہبی کردار کو کم کرتی ہیں، تو وہ پنڈالوں کے قریب سی پی آئی (ایم) کے کتابوں کے اسٹال لگانے کی اجازت نہ دیں۔