بارک پور میں خواتین کی حفاظت ڈرون اور درگا واہنی کے ذریعہ کی جائے گی : ارجن سنگھ
تہوار کے موسم میں ناخوشگوار واقعات سے بچنے کے لیے صنعتی علاقے میں پولیس نے سکیورٹی کا خصوصی منصوبہ تیار کیا ہے۔ بڑے درگا پوجا پنڈالوں میں ڈرون کے ذریعے نگرانی، خواتین کی حفاظت کے لیے درگا واہنی کی سرگرمیوں میں تیزی، اور شور کی مقررہ حدود کی خلاف ورزی کرنے والوں کے خلاف سخت کارروائی کی جائے گی۔ پیر کے روز بیرک پور کے سوکانت سدن میں منعقدہ انتظامی میٹنگ کے دوران ریاست کے محنت اور ٹرانسپورٹ کے وزیر ارجن سنگھ نے درگا پوجا کے حوالے سے یہی پیغام دیا۔
وزیر نے پولیس کو ہدایت دی کہ پنڈالوں میں خواتین کے خلاف نازیبا تبصرے یا ہراسانی کی شکایات کو کسی بھی صورت میں معمولی نہ سمجھا جائے۔ انہوں نے مہالیہ کے بعد سے ڈی جے کی تیز آواز کے مسئلے پر بھی خبردار کیا۔
دوسری جانب، پولیس کمشنر امیت کمار سنگھ نے بتایا کہ کمشنریٹ کے تحت آنے والے 23 تھانوں کے علاقوں میں تقریباً 3 ہزار درگا پوجا کمیٹیوں کو اجازت دی گئی ہے۔ سکیورٹی کے ساتھ ساتھ بھیڑ کو قابو میں رکھنے کے لیے منتظمین کو مناسب تعداد میں رضاکار تعینات کرنے کی ہدایت دی گئی ہے۔ پولیس کمشنر نے کانچرا پاڑہ اور ہالیشہر کے بڑے درگا پوجا پنڈالوں کے انتظامات کا موقع پر جا کر جائزہ بھی لیا۔
اس روز سوکانت سدن میں 1100 درگا پوجا کمیٹیوں کو سرکاری امداد کے چیک دیے گئے۔ باقی کمیٹیوں تک چیک مقامی تھانوں کے ذریعے پہنچائے جائیں گے۔ اس تقریب میں وزیر کلیان چکرورتی، رکنِ اسمبلی رتنا دیوناتھ اور کوستوب باگچی بھی موجود تھے۔انتظامیہ کے ذرائع کے مطابق، آئندہ چند دنوں میں وزیرِ اعلیٰ شوبھندو ادھیکاری صنعتی علاقے کے چار سے پانچ بڑے درگا پوجا پنڈالوں کا افتتاح کر سکتے ہیں۔