پانچ گول کرنے والے فٹبالر کو انعام لینے کے لیے بلایا گیا تو پٹائی کر دی
پولیس ذرائع کے مطابق، مشرقی بردوان کے گائتان پور مغربی پاڑہ میں اگراگامی کلب کی جانب سے فٹبال ٹورنامنٹ کا انعقاد کیا گیا تھا۔ یہ میچ شیب سائر میدان میں کھیلا گیا تھا۔ اس مقابلے میں 16 ٹیموں نے حصہ لیا تھا۔ منتظمین نے مختلف انعامات کا اعلان کیا تھا۔ ان میں ہر گول پر 100 روپے انعام دینے کا اعلان بھی شامل تھا۔
مقامی ذرائع کے مطابق، ایک میچ میں کوشک مکھوپادھیائے نامی فٹبالر نے پانچ گول کیے تھے۔ گزشتہ ہفتے سنیچر کے روز وہ انعام کے طور پر 500 روپے لینے پہنچے۔ لیکن الزام ہے کہ منتظمین نے ان کے ساتھ بدتمیزی کی۔ جب کوشک نے اس کی مخالفت کی تو انہیں بانس اور لوہے کی سلاخوں سے پیٹا گیا۔ اس حملے میں وہ شدید زخمی ہو گئے۔
بعد میں مقامی لوگوں نے کوشک کو بچا کر بردوان میڈیکل کالج میں داخل کرایا۔ فٹبالر کی طبیعت مزید خراب ہونے کے بعد انہیں وہاں سے کولکاتا کے این آر ایس میڈیکل کالج منتقل کر دیا گیا۔
پٹائی کا شکار ہونے والے فٹبالر کی والدہ چیتالی مکھوپادھیائے نے کھنڈگھوش تھانے میں شکایت درج کرائی۔ اس شکایت کی بنیاد پر پولیس نے دو ملزمین کو گرفتار کر لیا۔ گرفتار افراد کے نام سمن داس اور مدھوسودن رائے عرف سوشانت ہیں۔ دونوں کا تعلق کھنڈگھوش تھانے کے تحت گائتان پور علاقے سے ہے۔
پیر کے روز دونوں گرفتار ملزمین کو بردوان کی چیف جوڈیشل مجسٹریٹ (سی جے ایم) عدالت میں پیش کیا گیا۔ جج نے انہیں 25 اکتوبر تک عدالتی حراست میں رکھنے کا حکم دیا۔
انعام کی معمولی رقم مانگنے پر فٹبالر پر حملے کے الزام سے علاقے کے لوگ حیران ہیں۔ پولیس اس بات کی بھی جانچ کر رہی ہے کہ اس واقعے کے پیچھے کوئی اور وجہ تو نہیں تھی۔