امریکی قومی سلامتی کے مشیر مائیک والٹز کی ممکنہ برطرفی کی خبروں کے پس منظر میں جن پر اسرائیلی وزیر اعظم بنیامین نیتن یاہو کے ساتھ ایران کے خلاف عسکری حکمت عملی پر ہم آہنگی کا الزام ہے امریکی وزیر دفاع پیٹ ہیگستھ ایک اہم موقع پر اسرائیل کا دورہ کرنے والے ہیں۔ دو اسرائیلی حکام کے مطابق پیٹ ہیگستھ 12 مئی کو تل ابیب پہنچیں گے، جس کا مقصد مشرق وسطیٰ میں امریکی صدر ڈونلڈ ٹرمپ کے مجوزہ دورے سے قبل اہم دفاعی و سیاسی مشاورت ہے۔ یہ ان کا بہ طور وزیر دفاع اسرائیل کا پہلا دورہ ہوگا۔ اس دورے میں وہ اپنے اسرائیلی ہم منصب یسرائیل کاٹس اور وزیر اعظم نیتن یاہو سے ملاقات کریں گے، جس کے بعد وہ سعودی عرب میں صدر ٹرمپ کے ساتھ شامل ہوں گے۔ واضح رہے کہ واشنگٹن اور تل ابیب کے درمیان ایران سے نمٹنے کی حکمت عملی پر اختلافات پائے جاتے ہیں۔ اسرائیل فوری طور پر ایران کی ایٹمی تنصیبات پر عسکری کارروائی کا حامی ہے، جب کہ صدر ٹرمپ مرحلہ وار دباؤ کی پالیسی کے تحت پہلے سفارتی بات چیت اور اقتصادی پابندیوں کو ترجیح دیتے ہیں۔ ساتھ ہی وہ یمن میں حوثیوں کے خلاف امریکی فوجی مہم جاری رکھے ہوئے ہیں۔ یاد رہے کہ وائٹ ہاؤس کی ترجمان کیرولین لیوٹ کے مطابق صدر ٹرمپ کا دورہ مشرق وسطیٰ 13 سے 16 مئی تک سعودی عرب، قطر اور متحدہ عرب امارات کا ہوگا۔

Source: social media