ممبئی ، 3 مئی : مہاراشٹر حکومت نے بامبے ہائی کورٹ کو یقین دہانی کرائی کہ گیٹ وے آف انڈیا کے قریب جس دیوار کو مسافر جیٹی پروجیکٹ کے تحت گرانا ہے، وہ 20 جون سے پہلے منہدم نہیں کی جائے گی۔ یہ بیان کلین اینڈ ہیریٹیج کولابہ ریذیڈنٹ ایسوسی ایشن کی عرضی پر سماعت کے دوران دیا گیا، جس میں اس منصوبے کو چیلنج کیا گیا ہے۔ چیف جسٹس آلوک ارادے اور جسٹس ایم ایس کارنک کے بینچ کے روبرو دائر اس عرضی میں کہا گیا ہے کہ گیٹ وے کے قریب واقع یہ منصوبہ، جو ریڈیو کلب کے قریب بنایا جا رہا ہے، علاقے کے ورثے اور ماحول کے لیے خطرناک ہے۔ وکیل اسپی چنائے نے کہا کہ یہ منصوبہ پرانا ضرور ہے مگر عوام کو جنوری 2025 میں ہی اس کی اطلاع ملی۔ مارچ میں افتتاحی تقریب بھی ہوئی، مگر مقامی باشندوں سے نہ کوئی مشاورت کی گئی نہ نوٹس دیا گیا۔ چنائے نے عدالت کو بتایا کہ دیوار کی عمر 50 سے 60 سال ہے اور اس کا گرایا جانا مون سون سے پہلے خطرناک ثابت ہو سکتا ہے کیونکہ یہ بارش کے پانی کو روکنے میں مدد دیتی ہے۔ ان کا کہنا تھا کہ اس کی موجودگی منصوبے میں رکاوٹ بھی نہیں ڈالتی، لہٰذا اس کو گرانے کی کوئی فوری ضرورت نہیں۔ ریاستی وکیل بیرندر صراف نے کہا کہ گیٹ وے پر موجودہ کشتی سرگرمیاں خطرناک ہیں اور نئی جیٹی منصوبہ خوبصورتی اور حفاظت کا خیال رکھتا ہے۔ انہوں نے تسلیم کیا کہ دیوار کو 20 جون سے قبل نہیں گرایا جائے گا۔ درخواست گزاروں نے منصوبے کے لیے ماحولیاتی اور ہیریٹیج اجازتوں کے قانونی جواز پر بھی سوال اٹھائے ہیں اور منصوبے پر فوری روک کی درخواست کی ہے۔ عدالت نے تمام فریقین کو 7 جون تک جواب داخل کرنے کا حکم دیا ہے اور آئندہ سماعت 16 جون کو مقرر کی گئی ہے۔

Source: uni urdu news service