جو لوگ بات چیت میں شامل ہی نہیں تھے، انہیں انضمام کی خبر کیسے ہوگی: شرد پوار

مہاراشٹر میں نیشنلسٹ کانگریس پارٹی (این سی پی) کے دونوں دھڑوں کے ممکنہ انضمام کو لے کر غیر یقینی صورتحال بدستور قائم ہے۔ اسی غیر واضح فضا کے باعث انضمام کے مسئلے پر سیاسی تکرار بھی تھمنے کا نام نہیں لے رہی۔ پیر کے روز این سی پی (شرد پوار گروپ) کے سرپرست شرد پوار نے میڈیا سے رسمی گفتگو کے دوران ایک معنی خیز بیان دیتے ہوئے کہا کہ جو لوگ انضمام سے متعلق ہونے والی بات چیت میں شامل ہی نہیں تھے، انہیں اس بارے میں معلومات کیسے ہو سکتی ہیں۔ شرد پوار کا یہ تبصرہ بالواسطہ طور پر مہاراشٹر کے وزیر اعلیٰ دیویندر فڈنویس کے اس بیان کے جواب میں آیا ہے، جس میں فڈنویس نے کہا تھا کہ اگر واقعی دونوں این سی پی کے انضمام پر بات ہوئی ہوتی تو اجیت دادا پوار اس بارے میں انہیں ضرور آگاہ کرتے، کیونکہ اجیت پوار اور ان کا گروپ اس وقت مہایوتی حکومت کا حصہ ہے۔ ادھر اجیت پوار گروپ کی این سی پی کے ریاستی صدر سنیل تٹکرے نے بھی انضمام سے متعلق کسی بھی میٹنگ سے صاف انکار کیا ہے۔ ان کا کہنا ہے کہ اجیت دادا پوار نے ان سے کبھی انضمام کے موضوع پر بات نہیں کی۔ البتہ، انہوں نے یہ ضرور تسلیم کیا کہ ضلع پریشد کے انتخابات میں ساتھ مل کر لڑنے پر گفتگو ہوئی تھی۔ تٹکرے نے یہ بھی واضح کیا کہ ان کی پارٹی این ڈی اے کا حصہ ہے اور جو کوئی این ڈی اے میں شامل ہونا چاہے، وہ ان کے ساتھ آ سکتا ہے۔ ان کے مطابق، انضمام کا موضوع یہیں ختم ہو جاتا ہے۔ شرد پوار نے فڈنویس کا نام لیے بغیر ایک بار پھر یہ مؤقف دہرایا کہ چونکہ فڈنویس کا تعلق بی جے پی سے ہے، نہ کہ این سی پی سے، اس لیے وہ ان میٹنگز کے بارے میں کیسے جان سکتے ہیں جو پارٹی کے اندرونی سطح پر ہوئی ہوں۔ اس سے قبل شرد پوار یہ دعویٰ کر چکے ہیں کہ اجیت پوار نے دونوں این سی پی کے انضمام کی خواہش ظاہر کی تھی اور اس سلسلے میں بات چیت بھی ہوئی تھی۔ شرد پوار گروپ کے سینئر لیڈر جینت پاٹل سمیت دیگر رہنما بھی اس مؤقف کو دہرا رہے ہیں کہ اجیت پوار نے انضمام کی خواہش کا اظہار کیا تھا اور اس بارے میں 12 فروری کو باضابطہ اعلان متوقع تھا۔ تاہم، اجیت پوار کے اچانک انتقال کے بعد ان کے گروپ کے سینئر رہنماؤں کا کہنا ہے کہ اجیت دادا نے کبھی بھی انضمام کے حوالے سے کوئی بات نہیں کی تھی۔ دلچسپ بات یہ ہے کہ شرد پوار کے علاوہ پوار خاندان کا کوئی اور فرد اس معاملے پر کھل کر گفتگو نہیں کر رہا۔ اجیت پوار کی اہلیہ اور ریاست کی پہلی خاتون نائب وزیر اعلیٰ سنیترا پوار بھی اس معاملے پر خاموش ہیں۔ وہیں اجیت پوار کے بھتیجے اور رکن اسمبلی روہت پوار نے کہا ہے کہ وہ تیرھویں کے بعد ہی اس موضوع پر اپنا مؤقف واضح کریں گے۔

Source: social media