گھنی دھند کے سبب تاج محل نظروں سے اوجھل ہو گیا

آگرہ : اتوار کی صبح گھنی دھند چھا گئی جس کے باعث تاج محل ایک موٹی دھند کی اوٹ میں گم نظر آیا اور شہر بھر میں حد نگاہ نمایاں طور پر کم ہو گئی۔ تاج ویو پوائنٹ اے ڈی اے سے سامنے آنے والی مناظر میں یہ تاریخی عمارت بمشکل دکھائی دی۔ اسی طرح کے حالات ایودھیا میں بھی دیکھے گئے جہاں علی الصبح شہر پر دھند کی گہری تہہ چھائی رہی۔ محکمہ موسمیات کے مطابق ایودھیا میں کم سے کم درجہ حرارت 8 ڈگری سیلسیس ریکارڈ کیا گیا جبکہ زیادہ سے زیادہ درجہ حرارت 16 ڈگری سیلسیس کے آس پاس رہنے کا امکان ہے۔ مرادآباد میں بھی سرد لہر کے ساتھ دھند چھائی رہی۔ محکمہ موسمیات کے مطابق وہاں کم سے کم درجہ حرارت 10 ڈگری سیلسیس رہا جبکہ زیادہ سے زیادہ درجہ حرارت 19 ڈگری سیلسیس تک پہنچنے کی توقع ہے۔ ادھر قومی دارالحکومت دہلی میں بھی حالات مختلف نہیں رہے جہاں درجہ حرارت میں کمی کے ساتھ زہریلی اسموگ کی موٹی تہہ چھا گئی جس سے حد نگاہ بری طرح متاثر ہوئی اور شہریوں کو مشکلات کا سامنا کرنا پڑا۔ مرکزی آلودگی کنٹرول بورڈ کے مطابق صبح 7 بجے کے قریب مجموعی ایئر کوالٹی انڈیکس 390 ریکارڈ کیا گیا جو بہت خراب زمرے میں آتا ہے جبکہ کئی علاقوں میں ہوا کا معیار مزید بگڑ کر انتہائی خراب سطح تک پہنچ گیا۔ دہلی کے مختلف حصوں میں گہری دھند دیکھی گئی اور آلودگی کی سطح تشویشناک حد تک بلند رہی۔ اکشردھام علاقے میں اے کیو آئی 438 ریکارڈ کیا گیا جو انتہائی خراب زمرے میں آتا ہے۔ غازی پور علاقے میں بھی یہی صورتحال رہی جہاں اے کیو آئی 438 درج کیا گیا۔

Source: social media