جب ایس آئی آر ہو رہا ہے تو فارم 7 کی کیا ضرورت؟ اکھلیش یادو نے اٹھائے سوال، مسلم ووٹروں کو انتخابی عمل سے باہر کرنے کی سازش

لکھنؤ: اترپردیش کے سابق وزیر اعلیٰ اور سماج وادی پارٹی کے صدر اکھلیش یادو نے ووٹر لسٹ سے متعلق عمل اسپیشل انٹینسیو ریویژن (ایس آئی آر) اور فارم 7 کے استعمال پر شدید اعتراض کرتے ہوئے بھارتیہ جنتا پارٹی اور الیکشن کمیشن کو کڑی تنقید کا نشانہ بنایا ہے۔ انہوں نے الزام لگایا کہ بی جے پی ایک نجی کمپنی کے ساتھ مل کر، الیکشن کمیشن کی مبینہ رضامندی سے، خاص طبقے کے ووٹ کاٹنے کی سازش کر رہی ہے، جس کا مقصد مسلم ووٹروں کو انتخابی عمل سے باہر کرنا ہے۔ اکھلیش یادو نے کہا کہ جب اسپیشل انٹینسیو ریویژن (ایس آئی آر) کا عمل مکمل ہو چکا ہے اور پوری ووٹر لسٹ کی ریویژن ہو گئی ہے تو پھر فارم 7 لینے کی کیا ضرورت ہے؟ انہوں نے سوال اٹھایا کہ اگر ووٹر لسٹ پہلے ہی درست کی جا چکی ہے تو ووٹ کاٹنے کے لیے الگ سے فارم 7 کیوں استعمال کیا جا رہا ہے۔ ان کا کہنا تھا کہ یہ عمل شفافیت کے بجائے شکوک و شبہات کو جنم دیتا ہے۔ سماج وادی پارٹی کے سربراہ نے کہا کہ الیکشن کمیشن ایک آئینی ادارہ ہے اور اس کی بنیادی ذمہ داری یہ ہے کہ زیادہ سے زیادہ شہریوں کے ووٹ بنیں، کسی کا ووٹ نہ چھوٹے اور نہ ہی کسی کا ووٹ ناجائز طور پر کاٹا جائے۔ لیکن انہوں نے الزام عائد کیا کہ بی جے پی نے ایک بڑی نجی کمپنی کو یہ کام سونپ دیا ہے، جو الیکشن کمیشن کے ساتھ مل کر ووٹر لسٹ سے نام حذف کر رہی ہے۔ اکھلیش یادو نے دعویٰ کیا کہ جن ووٹروں کے نام کاٹے گئے ہیں، ان میں زیادہ تر مسلمانوں کے نام شامل ہیں۔ انہوں نے کہا کہ کچھ بی ایل اوز کے دستخط کے ذریعے بڑی تعداد میں ووٹ حذف کیے گئے، جس سے یہ واضح ہوتا ہے کہ اس عمل کے پیچھے منظم منصوبہ بندی ہے۔ انہوں نے طنزیہ انداز میں کہا کہ میں ان بی ایل اوز کا شکریہ ادا کرتا ہوں جنہوں نے اپنی ذمہ داری نبھائی اور سچ کو سامنے آنے دیا۔ انہوں نے یہ بھی الزام لگایا کہ بی جے پی نے مزدور طبقے سے تعلق رکھنے والے افراد سے زبردستی یا دھوکے سے دستخط کروا لیے، حالانکہ وہ افراد عام طور پر انگوٹھا لگاتے ہیں۔ اکھلیش یادو کے مطابق، یہ پورا عمل جمہوریت کو کمزور کرنے اور ووٹرز کے حق رائے دہی کو سلب کرنے کی کوشش ہے۔

Source: social media