جے پور میں 24 گھنٹوں کے لیے موبائل انٹرنیٹ معطل، تجاوزات ہٹانے کی کارروائی سے قبل انتظامیہ الرٹ

جے پور: جے پور ڈیولپمنٹ اتھارٹی (جے ڈی اے) کی جانب سے 8 جون کو مجوزہ تجاوزات مخالف کارروائی سے قبل ضلع انتظامیہ نے امن و امان برقرار رکھنے کے لیے سخت احتیاطی اقدامات کیے ہیں۔ ممکنہ افواہوں، اشتعال انگیز پیغامات اور سوشل میڈیا کے ذریعے غلط معلومات کے پھیلاؤ کو روکنے کے مقصد سے شہر کے متعدد علاقوں میں موبائل انٹرنیٹ اور سوشل میڈیا خدمات عارضی طور پر معطل کرنے کا فیصلہ کیا گیا ہے۔ ڈویژنل کمشنر جے پور وی سَرَوَن کمار کی جانب سے جاری کردہ حکم نامے کے مطابق انتظامیہ کو خدشہ ہے کہ بعض عناصر سوشل میڈیا پلیٹ فارمز اور انٹرنیٹ پر مبنی خدمات کا غلط استعمال کرتے ہوئے افواہیں پھیلا سکتے ہیں، جس سے عوامی امن اور قانون و انتظام کی صورتحال متاثر ہونے کا اندیشہ ہے۔ اسی خدشے کے پیش نظر احتیاطی اقدام کے طور پر مخصوص علاقوں میں انٹرنیٹ سروسز پر پابندی عائد کی گئی ہے۔ حکم کے مطابق 7 جون کی رات 12 بجے سے 8 جون کی رات 12 بجے تک جے پور پولیس کمشنریٹ کے تحت آنے والے تمام علاقوں اور جے پور نارتھ و جے پور ایسٹ اضلاع کے تمام تھانوں کی حدود میں 2جی، 3جی، 4جی اور 5جی موبائل انٹرنیٹ خدمات معطل رہیں گی۔ اس دوران واٹس ایپ، فیس بک، ایکس، انسٹاگرام اور دیگر سوشل میڈیا پلیٹ فارمز تک رسائی بھی بند رہے گی۔ اسی طرح بلک ایس ایم ایس اور ایم ایم ایس سروسز پر بھی پابندی نافذ رہے گی۔ انتظامیہ کے مطابق یہ پابندی شہر اور مضافاتی علاقوں کے درجنوں تھانوں کی حدود میں نافذ ہوگی، جن میں گلتا گیٹ، مانک چوک، سبھاش چوک، آدرش نگر، برہم پوری، ناہر گڑھ، کوتوالی، جلوپورہ، شانتی نگر، ویدیا دھر نگر، بنی پارک، کانوتا، تونگا، جموا رام گڑھ، سامود، گووند گڑھ، چندواجی، وراٹ نگر، چو موں، جھوٹ واڑا، ویشالی نگر، سوڈالا، شیام نگر، مالویہ نگر، جواہر سرکل، سانگانیَر، پرتاپ نگر، موہانا، بگرو، دودو، پھاگی اور پھلیرا سمیت دیگر علاقے شامل ہیں۔ تاہم انتظامیہ نے واضح کیا ہے کہ وائس کال سروسز معمول کے مطابق جاری رہیں گی اور شہری موبائل فون کے ذریعے صوتی رابطہ برقرار رکھ سکیں گے۔ پابندی صرف موبائل انٹرنیٹ اور سوشل میڈیا پلیٹ فارمز تک محدود ہوگی۔ ضلع انتظامیہ نے شہریوں سے اپیل کی ہے کہ وہ امن، بھائی چارے اور قانون کی بالادستی برقرار رکھنے میں تعاون کریں اور کسی بھی غیر مصدقہ اطلاع پر یقین نہ کریں۔ ساتھ ہی خبردار کیا گیا ہے کہ حکومتی احکامات کی خلاف ورزی کرنے والوں کے خلاف متعلقہ قوانین کے تحت سخت کارروائی عمل میں لائی جائے گی۔ انتظامیہ کا کہنا ہے کہ ان اقدامات کا مقصد صرف امن و امان کو یقینی بنانا اور کسی بھی ناخوشگوار صورتحال سے بچاؤ ہے۔

Source: social media