جے این یو طلبہ کا احتجاجی مظاہرہ پرتشدد ہو گیا

نئی دہلی، 26 فروری : جواہر لال نہرو یونیورسٹی اسٹوڈنٹس یونین (جے این یو ایس یو) کے طلبہ کا احتجاجی مارچ جمعرات کو پرتشدد شکل اختیار کر گیا۔ پولیس کے مطابق تقریباً 400 سے 500 طلبہ جمع ہوئے تھے اور انہوں نے اپنے احتجاج کو کیمپس تک ہی محدود رکھنے کی درخواست کو ان سنا کر دیا۔ ایک افسر نے بتایا کہ حکام کی تنبیہ کے باوجود طلبہ جے این یو کیمپس سے وزارتِ تعلیم کی طرف بڑھ رہے تھے ۔ خبروں کے مطابق یہ احتجاج اس وقت مشتعل ہو گیا جب طلبہ نے بیریکیڈز توڑ دیے ، بینرز اور ڈنڈے پھینکے اور دہلی پولیس کے اہلکاروں کے ساتھ ہاتھا پائی کی۔ ہاتھا پائی کے دوران کچھ اہلکاروں کو مبینہ طور پر دانتوں سے کاٹے جانے کی بھی اطلاع ہے ۔ مظاہرین کو جے این یو کے نارتھ گیٹ (شمالی دروازے ) پر روک دیا گیا اور آہستہ آہستہ واپس کیمپس کے اندر بھیج دیا گیا۔ اس احتجاج کے دوران کئی پولیس اہلکار زخمی بھی ہوئے ہیں۔ حکام نے تصدیق کی ہے کہ تشدد کرنے والے اور قانونی احکامات کی خلاف ورزی کرنے والے طلبہ کو حراست میں لے لیا گیا ہے ۔ جے این یو انتظامیہ نے پہلے ہی واضح کر دیا تھا کہ کیمپس کے باہر اس طرح کے احتجاج کی اجازت نہیں ہے ۔

Source: UNI NEWS