دہشت گردی کی سازش کا پردہ فاش: تمل ناڈو سے چھ مشتبہ افراد گرفتار، آئی ایس آئی اور بنگلہ دیشی دہشت گرد گروپوں سے روابط

دہلی پولیس کے اسپیشل سیل نے ایک بڑی کامیابی حاصل کی ہے۔ تمل ناڈو سے چھ مشتبہ افراد کو گرفتار کیا گیا ہے۔ ان پر الزام ہے کہ انہوں نے پاکستان کی خفیہ ایجنسی آئی ایس آئی اور بنگلہ دیشی دہشت گرد تنظیموں کی ایماء پر ہندستان میں دہشت گردی کی ایک بڑی سازش رچائی تھی۔ تمام ملزمان کو تمل ناڈو سے دہلی لایا جا رہا ہے۔ گرفتار ہونے والوں میں ایک بنگلہ دیشی شہری بھی شامل ہے۔ ان ملزمان کے پاس سے کچھ اشتعال انگیز مواد بھی برآمد ہوا ہے جس سے تفتیش کی جا رہی ہے۔ اس سے قبل پولیس نے مغربی بنگال سے دو مشتبہ افراد کو گرفتار کیا ہے۔ دہلی پولیس کے اسپیشل سیل نے خفیہ ایجنسیوں سے ملی اطلاع کے بعد یہ بڑی کارروائی کی۔ ابتدائی تحقیقات سے معلوم ہوا ہے کہ یہ ملزمان بھارت میں کسی بڑی واردات کو انجام دینے کی منصوبہ بندی کر رہے تھے۔ ان مشتبہ افراد کے پاکستان کی آئی ایس آئی سے روابط کا شبہ ہے جو طویل عرصے سے بھارت مخالف سرگرمیوں میں ملوث رہی ہے۔ مزید برآں بنگلہ دیشی دہشت گرد تنظیموں کے کردار کی بھی چھان بین کی جا رہی ہے۔ گرفتار ملزمان سے متعدد موبائل فونز اور سم کارڈز برآمد ہوئے ہیں۔ ابتدائی تحقیقات سے معلوم ہوا ہے کہ یہ آلات دہشت گرد تنظیموں کی حمایت میں پیغامات پھیلانے اور مشتبہ ہینڈلرز سے رابطے برقرار رکھنے کے لیے استعمال کیے جا رہے تھے۔ دہلی پولیس ان موبائل فونز اور سم کارڈز کے نیٹ ورک، کنکشن اور پوری سازش کا پردہ فاش کرنے کے لیے ان کی مکمل چھان بین کر رہی ہے۔ دہلی پولیس کے مطابق، "تمل ناڈو کے چھ افراد، یعنی میزان الرحمان، محمد شبات، عمر، محمد لتھن، محمد شاہد، اور محمد اجل کو گرفتار کیا گیا ہے، جو سماج دشمن سرگرمیوں میں ملوث ہیں۔ وہ سوشل میڈیا پر پاکستانی دہشت گرد تنظیموں کی حمایت میں مواد پوسٹ کر رہے تھے۔ دو ملزمان کو اتھکولی سے، تین کو پلادم سے گرفتار کیا گیا، اور ایک کو تھیرموگن علاقے سے گرفتار کیا گیا۔"

Source: social media