’دس روپے والا بسکٹ‘ سے مشہور شاداب جکاتی پھر تنازع میں، میرٹھ میں اداکارہ کے شوہر کا تھانے میں ہنگامہ

میرٹھ میں سوشل میڈیا پر ’’10 روپے والا بسکٹ کتنے کا ہے جی‘‘ کہہ کر شہرت پانے والے یوٹیوبر شاداب جکاتی ایک بار پھر تنازع کا مرکز بن گئے ہیں۔ شاداب کے ساتھ ویڈیوز میں کام کرنے والی ایک خاتون کے شوہر نے تھانے پہنچ کر ہنگامہ کیا اور اپنی بیوی اور شاداب جکاتی پر سنگین الزامات عائد کیے۔ اس واقعے سے متعلق ویڈیوز سوشل میڈیا پر تیزی سے وائرل ہو رہی ہیں، جس کے بعد معاملہ عوامی بحث کا موضوع بن گیا ہے۔ یہ معاملہ میرٹھ کے انچولی تھانہ علاقہ کا ہے، جہاں شاداب جکاتی یوٹیوب کے لیے ویڈیوز بناتے ہیں۔ ان کے ساتھ ایک خاتون ساتھی بھی کام کرتی ہے، جو مختلف ویڈیوز میں نظر آتی ہے۔ خاتون کے شوہر خورشید عرف سونو اچانک تھانے پہنچے اور زبردست ہنگامہ کیا۔ خورشید نے الزام لگایا کہ اس کی بیوی اس کی جان لینے کی سازش کر رہی ہے اور وہ شاداب جکاتی کے ساتھ بنا بتائے گھر سے چلی جاتی ہے۔ خورشید کا کہنا تھا کہ اس کی بیوی اسے دھمکیاں دیتی ہے اور کہتی ہے کہ وہ یہ سب کچھ شاداب کے کہنے پر کر رہی ہے۔ اس نے پولیس کے سامنے روتے ہوئے اپنی اور اپنے بچوں کی جان کو خطرہ بتایا اور سکیورٹی کی مانگ کی۔ خورشید کا الزام ہے کہ اس کی بیوی کئی دنوں تک گھر سے غائب رہتی ہے اور پوچھنے پر مختلف بہانے بناتی ہے۔ ہنگامے کے دوران خورشید نے کہا، ’’میری بیوی میرے مطلب کی نہیں ہے۔ شادی کے بعد اس کے کئی لوگوں سے تعلقات رہے، میں نے سب برداشت کیا۔ اب یہ شاداب جکاتی کے ساتھ لگی ہوئی ہے۔ شاداب اسے تین تین، چار چار دن کے لیے لے جاتا ہے۔ کچھ دن پہلے بھی وہ گئی تھی۔ جب میں نے روکا تو کہنے لگی کہ میں دہرادون جا رہی ہوں‘‘۔ خورشید نے مزید کہا کہ وہ دل کا مریض ہے اور اکثر بیمار رہتا ہے، لیکن اس کی بیوی اسے مر جانے تک کی بات کہتی ہے۔ اس کے مطابق بیوی اسے گالیاں دیتی ہے، کبھی طلاق کی دھمکی دیتی ہے اور کبھی تھانے میں جھوٹے مقدمات میں پھنسانے کی بات کرتی ہے۔ خورشید نے الزام لگایا کہ یہ سب کچھ شاداب جکاتی کے کہنے پر ہو رہا ہے اور وہ سب مل کر اسے مارنے کی سازش کر رہے ہیں۔ خورشید کا یہ ویڈیو تھانے کے اندر اور باہر ریکارڈ ہوا، جو بعد میں سوشل میڈیا پر وائرل ہو گیا۔ ویڈیو میں وہ بار بار اپنی جان کو خطرہ بتاتے ہوئے پولیس سے مدد کی اپیل کرتا نظر آتا ہے۔ دوسری جانب اس معاملے میں خاتون نے بھی ویڈیو جاری کر کے اپنے شوہر کے تمام الزامات کو بے بنیاد قرار دیا ہے۔ خاتون، جس کا نام ایرم بتایا جا رہا ہے، نے کہا کہ وہ شاداب جکاتی کے ساتھ صرف کام کرتی ہے اور اس کے بدلے اسے پیسے ملتے ہیں۔ اس کا کہنا ہے کہ اس کے شوہر خورشید اس کے ساتھ مارپیٹ کرتے ہیں اور پیسوں کا مطالبہ کرتے ہیں۔ ایرم نے اپنے ویڈیو بیان میں کہا، ’’میں چار بچوں کی ماں ہوں اور اپنے بچوں کا پیٹ پالنے کے لیے کام کر رہی ہوں۔ شاداب کے ساتھ میں اپنی مرضی سے کام کرتی ہوں، کوئی زبردستی نہیں ہے۔ میرے شوہر کو یہ بات برداشت نہیں ہو رہی، اسی لیے وہ مجھ پر جھوٹے الزامات لگا رہے ہیں‘‘۔ ایرم نے مزید کہا کہ شاداب جکاتی کا اس پورے معاملے سے کوئی لینا دینا نہیں ہے اور ان پر لگائے گئے تمام الزامات جھوٹے ہیں۔ اس کے مطابق وہ اپنے گھر میں ہی رہتی ہے اور جہاں بھی جاتی ہے اپنی مرضی سے جاتی ہے۔ شاداب اس پر نہ دباؤ ڈالتے ہیں اور نہ ہی کہیں لے کر جاتے ہیں۔ خاتون کا کہنا ہے کہ اس کا شوہر مسلسل اس کے ساتھ تشدد کرتا رہا ہے، جس کی وجہ سے وہ اس سے الگ رہنا چاہتی ہے۔ ایرم نے دعویٰ کیا کہ اس کے شوہر نے اسے طلاق بھی دے دی ہے اور اب وہ قانونی طور پر حتمی طلاق چاہتی ہے۔ اس کے مطابق اس کی زندگی میں اب شوہر کے لیے کوئی جگہ نہیں بچی ہے۔ ایرم نے واضح کیا کہ شاداب جکاتی کے ساتھ اس کا کوئی افیئر نہیں ہے اور دونوں کے درمیان تعلق صرف کام تک محدود ہے۔ انہوں نے کہا کہ وہ جو کچھ بھی کرتی ہے اپنی مرضی سے کرتی ہے اور اپنے بچوں کے بہتر مستقبل کے لیے محنت کر رہی ہے۔ فی الحال یہ معاملہ پولیس کے ہاتھوں میں ہے۔ شوہر خورشید نے تھانے میں تحریری شکایت درج کرائی ہے، جبکہ خاتون ایرم نے بھی اپنے بیانات ریکارڈ کرا دیے ہیں۔ پولیس کا کہنا ہے کہ دونوں فریقوں کے الزامات کی جانچ کی جا رہی ہے اور تفتیش کے بعد ہی کوئی قانونی کارروائی کی جائے گی۔

Source: social media