دہلی میں ایک اور ہولناک آتشزدگی، تغلق آباد کی پانچ منزلہ عمارت میں آگ، 3 افراد جاں بحق

نئی دہلی :دہلی اور این سی آر میں آتشزدگی کے بڑھتے ہوئے واقعات نے شہریوں کی تشویش میں اضافہ کر دیا ہے۔ مالویہ نگر کے ایک ہوٹل میں پیش آنے والے خوفناک آتشزدگی کے واقعے اور نوئیڈا کے سیکٹر 52 اور سیکٹر 74 میں واقع آئیوی کاؤنٹی سوسائٹی میں لگی آگ کے بعد اب جنوبی مشرقی دہلی کے تغلق آباد علاقے سے ایک اور دل دہلا دینے والی خبر سامنے آئی ہے۔ جمعہ کی علی الصبح ایک کثیر منزلہ عمارت میں لگنے والی شدید آگ کے نتیجے میں تین افراد کی موت ہو گئی، جب کہ متعدد افراد کو بروقت ریسکیو کرکے محفوظ مقام پر منتقل کیا گیا۔اطلاعات کے مطابق یہ حادثہ صبح تقریباً 2 بج کر 25 منٹ پر پیش آیا۔ تغلق آباد کی گلی نمبر ایک میں واقع ’’نیا تارا اپارٹمنٹ‘‘ کے قریب ایک پانچ منزلہ عمارت کے گراؤنڈ فلور پر موجود پارکنگ ایریا میں اچانک آگ بھڑک اٹھی۔ ابتدائی طور پر آگ نے وہاں کھڑی تین اسکوٹیز، دو موٹر سائیکلوں اور ایک سائیکل کو اپنی لپیٹ میں لیا۔ گاڑیوں کے ایندھن کے ٹینک پھٹنے کے باعث آگ نے دیکھتے ہی دیکھتے شدت اختیار کر لی اور اس سے اٹھنے والا سیاہ اور زہریلا دھواں پوری عمارت میں پھیل گیا۔ رات کے وقت زیادہ تر رہائشی گہری نیند میں تھے، اس لیے آگ اور دھویں کے باعث عمارت میں افراتفری مچ گئی۔ لوگ اپنی جان بچانے کے لیے ادھر اُدھر بھاگنے لگے جبکہ کئی افراد بالائی منزلوں پر پھنس گئے۔ مقامی لوگوں نے فوری طور پر فائر بریگیڈ کو اطلاع دی، جس کے بعد دہلی فائر سروس کی متعدد گاڑیاں موقع پر پہنچ گئیں۔فائر بریگیڈ حکام کے مطابق عمارت تک پہنچنے میں کافی مشکلات پیش آئیں کیونکہ گلیاں انتہائی تنگ تھیں۔ دہلی فائر سروس کے اسسٹنٹ ڈویژنل آفیسر یشونت مینا نے بتایا کہ آگ اور دھواں گراؤنڈ فلور سے پانچویں منزل تک پھیل چکا تھا، جس کی وجہ سے ریسکیو آپریشن انتہائی چیلنجنگ بن گیا تھا۔ ریسکیو کے دوران فائر فائٹرز جب سیڑھیوں کے ذریعے عمارت کی چھت پر پہنچے تو وہاں جانے والا مرکزی دروازہ بند تھا۔ وقت ضائع کیے بغیر ٹیم نے کٹر کی مدد سے تالہ توڑا اور چھت پر پھنسے ہوئے دو لڑکیوں سمیت آٹھ افراد کو بحفاظت باہر نکال لیا۔ امدادی کارکنوں نے کئی گھنٹوں کی مسلسل جدوجہد کے بعد صبح تقریباً چار بجے آگ پر مکمل قابو پا لیا۔حادثے میں تین افراد دھویں میں دم گھٹنے اور جھلسنے کے باعث جان کی بازی ہار گئے، جبکہ زخمی اور متاثرہ افراد کو فوری طور پر قریبی اسپتال منتقل کیا گیا۔ پولیس اور فائر حکام واقعے کی وجوہات جاننے کے لیے تحقیقات کر رہے ہیں۔ اس افسوسناک سانحے نے ایک بار پھر دہلی میں عمارتوں کے فائر سیفٹی انتظامات پر سنگین سوالات کھڑے کر دیے ہیں۔

Source: social media