دہلی کے مالویہ نگر کی کثیر منزلہ عمارت میں ہولناک آتشزدگی، 21 افراد ہلاک، متعدد زخمی

نئی دہلی: بدھ کی صبح دہلی کے مالویہ نگر علاقے میں واقع ایک کثیر منزلہ عمارت میں قائم ’لیمن گرین ریسٹورنٹ‘ میں خوفناک آگ بھڑک اٹھی، جس کے نتیجے میں اب تک 21 افراد ہلاک ہو چکے ہیں جبکہ متعدد افراد زخمی ہوئے ہیں۔ اس کی تصدیق دہلی پولیس کے حکام نے کی ہے۔ دہلی پولیس کے مطابق زخمیوں کو فوری طور پر اسپتال منتقل کر دیا گیا، جہاں ان کا علاج جاری ہے۔ دیگر افراد کی تلاش کے لیے سرچ اور ریسکیو آپریشن بدستور جاری ہے۔ حکام کا کہنا ہے کہ طبی رپورٹس موصول ہونے کے بعد ہی زخمیوں کی حالت کے بارے میں مزید معلومات دی جا سکیں گی۔ اطلاع ملتے ہی فائر بریگیڈ کی 10 گاڑیاں فوری طور پر موقع پر روانہ کی گئیں۔ امدادی کارروائیوں کے بعد آگ پر قابو پا لیا گیا، تاہم عمارت کے مختلف حصوں کی تلاشی کا عمل جاری ہے۔ مالویہ نگر کے سب ڈویژنل مجسٹریٹ جتیندر کمار نے صحافیوں سے گفتگو کرتے ہوئے بتایا، ’’جیسے ہی صبح اس واقعے کی اطلاع ملی، ہم نے اپنی ٹیموں کو متحرک کر دیا اور تمام متعلقہ اداروں کو موقع پر روانہ کیا۔ مجھے تربیتی پروگرام میں شرکت کرنا تھی، لیکن میں اسے چھوڑ کر جائے حادثہ پہنچ گیا۔‘‘ انہوں نے کہا کہ ابتدائی معلومات کے مطابق عمارت کے نچلے حصے میں ایک ریسٹورنٹ چل رہا تھا اور شبہ ظاہر کیا جا رہا ہے کہ آگ کا تعلق اسی ریسٹورنٹ سے ہو سکتا ہے، تاہم اصل وجہ کا تعین ابھی نہیں ہو سکا۔ ایس ڈی ایم کے مطابق اب تک کئی لاشیں برآمد کر کے اسپتال بھیجی جا چکی ہیں جبکہ 7 سے 8 افراد زخمی ہوئے ہیں۔ انہوں نے بتایا کہ بعض افراد نے جان بچانے کے لیے تیسری منزل سے چھلانگ لگا دی۔ مقامی لوگوں نے نیچے گدّے بچھا کر انہیں بچانے کی کوشش کی۔ حکام کے مطابق بجلی فراہم کرنے والی کمپنی نے بروقت علاقے کی بجلی منقطع کر دی، جس سے مزید نقصان اور ممکنہ حادثات سے بچنے میں مدد ملی۔ انہوں نے زور دیتے ہوئے کہا کہ اس سانحے کے ذمہ دار افراد کے خلاف سخت کارروائی ضروری ہے اور ریسٹورنٹ کے لائسنس کی جانچ کے احکامات بھی جاری کر دیے گئے ہیں۔ مالویہ نگر آتشزدگی کے واقعے میں ہلاکتوں کی تعداد میں اضافے کا خدشہ ظاہر کیا جا رہا ہے، جبکہ پولیس، فائر بریگیڈ اور دیگر متعلقہ ادارے امدادی اور تفتیشی کارروائیوں میں مصروف ہیں۔

Source: social media