دہلی کے اتم نگر میں دو خاندانوں کے درمیان جھڑپ میں نوجوان کی موت، چھ ملزمان گرفتار

نئی دہلی، 7 مارچ : مغربی دہلی کے اتم نگر علاقے میں دو پڑوسی خاندانوں کے درمیان پرتشدد جھڑپ میں ایک 26 سالہ شخص کی موت ہو گئی۔ پولیس ذرائع کے مطابق اس معاملے میں اب تک چھ افراد کو گرفتار کیا گیا ہے ، اور ایک نابالغ کو حراست میں لیا گیا ہے ۔ گرفتار ملزمان کی شناخت عمرالدین (49)، جمال الدین (36)، مصدق (46)، قمرالدین (36)، مظفر (25) اور طاہر (18) کے طور پر کی گئی ہے ، یہ تمام اتم نگر کے باشندے ہیں۔ ڈپٹی پولس کمشنر (دوارکا) کشال پال سنگھ نے بتایا کہ بدھ کی رات تقریباً 11:09 بجے دہلی پولیس کو پڑوسیوں کے درمیان لڑائی کے بارے میں پی سی آر کال موصول ہوئی۔ جائے وقوعہ پر پہنچ کر پولیس کو معلوم ہوا کہ جھگڑا اس وقت شروع ہوا جب ایک لڑکی نے مبینہ طور پر ایک خاتون پر پانی کا غبارہ پھینکا۔ اس کے بعد دونوں خاندانوں کے افراد سڑک پر جمع ہو گئے اور کہا سنی پرتشدد لڑائی میں بدل گئی۔ جھگڑے کے دوران دونوں فریقوں کے درمیان ہاتھا پائی ہو گئی جس سے ایک طرف سے تین اور دوسری طرف سے پانچ افراد زخمی ہو گئے ۔ تمام زخمیوں کو اسپتال لے جایا گیا۔ ان میں سے 26 سالہ ترون کو شدید چوٹیں آئیں اور جمعرات کے روز علاج کے دوران اس کی موت ہو گئی۔ ابتدائی طور پر، پولیس نے تعزیرات ہند (بی این ایس) کی دفعہ 110 اور 3(5) کے تحت مقدمہ درج کیا۔ تاہم، ترون کی موت کے بعد، دفعہ 103(1) (قتل) بھی شامل کر دیا گیا۔ تحقیقات سے یہ بات سامنے آئی کہ دونوں خاندان تقریباً پانچ دہائیوں سے ایک دوسرے کو جانتے تھے اور اس سے قبل ان کے درمیان پارکنگ اور کوڑے کو ٹھکانے لگانے جیسے معمولی معاملات پر جھگڑے ہوئے تھے ۔ پولیس نے کہا کہ کچھ سماج دشمن عناصر اس واقعہ کو فرقہ وارانہ موڑ دینے کی کوشش کر رہے ہیں اور ان کے خلاف سخت کارروائی کی جائے گی۔ فی الحال علاقے میں صورتحال مکمل طور پر قابو میں ہے اور لوگوں سے افواہوں کو نظر انداز کرنے کی تاکید کی گئی ہے ۔

Source: UNI NEWS