پرولیا میں تیار ہوں گے دفاعی سازوسامان، رگھوناتھ پور میں شبھیندو حکومت کا بڑا قدم
صنعتی علاقے رگھوناتھ پور کی صنعتی ترقی کے لیے ریاستی حکومت نے ایک اور بڑا قدم اٹھایا ہے۔ پرولیا کے رگھوناتھ پور میں امیت میٹالکس کے بعد اب جیوپیٹر ڈیفنس پرائیویٹ لمیٹڈ ایک مربوط دفاعی سازوسامان تیار کرنے کا مرکز قائم کرے گی۔ ریاستی صنعتی ترقیاتی کارپوریشن کے ذرائع کے مطابق کمپنی بہت جلد اس کام کا آغاز کرے گی۔
حال ہی میں ریاستی حکومت نے رگھوناتھ پور 2 بلاک کے رکنی علاقے میں اس منصوبے کے لیے 255 ایکڑ زمین فراہم کی ہے۔ تقریباً ایک ہفتہ قبل پرولیا پہنچ کر ریاست کے وزیر اعلیٰ شبھیندو ادھیکاری نے کہا تھا کہ آئندہ ایک سال کے اندر اس ضلع میں ایک لاکھ کروڑ روپے کی سرمایہ کاری ہوگی۔ ان کے اس بیان سے سات دن قبل ہی کولکاتا میں باقاعدہ کیمپ لگا کر متعدد صنعتی اداروں کے ساتھ جیوپیٹر کو بھی رگھوناتھ پور میں صنعت قائم کرنے کے لیے زمین فراہم کی گئی تھی۔ اس سے علاقے کے لوگ کافی خوش ہیں۔ صرف یہی نہیں، اس سے روزگار کے وسیع مواقع بھی پیدا ہوں گے۔
تقریباً 17 سال قبل بائیں بازو کے دورِ حکومت میں رگھوناتھ پور کے وسیع علاقے میں کئی سو ایکڑ زمین حاصل کی گئی تھی۔ اسی حاصل شدہ زمین میں سے ریاستی صنعتی ترقیاتی کارپوریشن نے 255 ایکڑ زمین مذکورہ صنعتی ادارے کے حوالے کی ہے۔
رگھوناتھ پور 2 بلاک کے جس رکنی علاقے میں یہ صنعت قائم کی جائے گی، وہاں بائیں بازو کے دورِ حکومت میں ماڈرن کارپوریشن لمیٹڈ کو اسٹیل صنعت کے لیے زمین دی گئی تھی۔ لیکن کمپنی وہاں صنعت قائم نہیں کر سکی۔ اس کے بعد ریاست نے اس سے زمین واپس لے لی۔
ریاست کی جانب سے حاصل کی گئی زمین طویل عرصے تک خالی پڑی رہنے کے باعث مقامی لوگوں میں ناراضی بڑھ رہی تھی۔ انہوں نے صنعت کے قیام کی امید میں ریاست کو اپنی زمین دی تھی۔ لیکن ترنمول حکومت کے دور میں رگھوناتھ پور کے اس حصے میں اس طرح کی کوئی بڑی صنعت قائم نہیں ہو سکی۔ نتیجتاً علاقے کے لوگ روزگار کے مسئلے سے پریشان ہیں۔ روزی روٹی کی خاطر اس علاقے کے باشندوں کو مشرقی ہندوستان کے دیگر علاقوں یا دوسری ریاستوں کا رخ کرنا پڑتا ہے۔
ریاست کا کہنا ہے کہ اگر جیوپیٹر پرائیویٹ لمیٹڈ یہاں کارخانہ قائم کرتی ہے تو علاقے کے لوگوں کے لیے روزگار کے مواقع پیدا ہوں گے۔
جس علاقے میں یہ زمین دی گئی ہے، وہاں سے جنوبی مشرقی ریلوے کی آدرا-گومو ریلوے لائن پر رکنی اسٹیشن موجود ہے۔ دوسری جانب رگھوناتھ پور-چیلیاما سڑک پر موتوڑ علاقے سے یہ جگہ صرف 3 کلومیٹر دور ہے۔ اس لیے منصوبے کی جگہ سے ریل اور سڑک، دونوں ذرائع سے آمدورفت میں کوئی خاص دشواری نہیں ہے۔ قریب ہی دھانارا گاو¿ں بھی واقع ہے۔ مقامی لوگ چاہتے ہیں کہ طویل عرصے سے خالی پڑی زمین پر جلد از جلد کارخانہ قائم کیا جائے۔
ریاست کا خیال ہے کہ مجوزہ دفاعی سازوسامان مرکز میں براہِ راست اور بالواسطہ طور پر بڑی تعداد میں لوگوں کو روزگار ملے گا۔ ریاست میں اقتدار کی تبدیلی کے بعد صنعتی علاقے رگھوناتھ پور میں جس طرح ایک کے بعد ایک سرمایہ کاری آ رہی ہے، اس سے یہ صنعتی خطہ واقعی تبدیل ہو جائے گا، ایسا مقامی لوگوں کا کہنا ہے۔
تاہم وسیع صنعتی علاقے رگھوناتھ پور میں ریڈ کیٹیگری کی صنعتوں کو لے کر لوگوں میں شدید ناراضی بھی موجود ہے۔ اس سلسلے میں ایک کے بعد ایک احتجاج بھی جاری ہے۔ امیت میٹالکس بھی اسی فہرست میں شامل ہے۔ اگرچہ مذکورہ صنعتی ادارے نے واضح طور پر کہا ہے کہ اس کا کارخانہ مکمل طور پر ماحول دوست منصوبہ ہے۔