دن میں کتنی بار چائے پی رہے ہیں، اس پر بھی نظر ہے“، نیتن کی ارکانِ اسمبلی کو وارننگ
پارٹی سب سے پہلے ہے، صرف خاندان تک محدود ہو کر کام نہیں چلے گا۔ بی جے پی کے آل انڈیا صدر نیتن نوین نے پارٹی کے ارکانِ اسمبلی کو سخت پیغام دیا ہے۔ ریاست میں اقتدار کی تبدیلی کے بعد وہ اتوار کو ہی بنگال پہنچے ہیں۔ اتوار کو انہوں نے کئی مرحلوں میں بنگال بی جے پی کی قیادت کے ساتھ میٹنگیں کیں۔
ذرائع کے مطابق، نیتن نوین نے ارکانِ اسمبلی کے ایک حصے سے کہا کہ کچھ ارکانِ اسمبلی ایسے ہیں جو اپنے خاندان کے علاوہ کسی اور کو جانتے تک نہیں۔ وہ صرف اپنے خاندان کے ساتھ ہی چل رہے ہیں۔ انہوں نے واضح کر دیا کہ اگر یہ سلسلہ جاری رہا تو اگلے انتخابات میں ایسے ارکانِ اسمبلی کو دوبارہ ٹکٹ نہیں ملے گا۔
ارکانِ اسمبلی کو ان کا مزید پیغام تھا کہ انہیں سادہ اور عام زندگی گزارنی چاہیے۔ پارٹی اس بات پر بھی نظر رکھے گی کہ وہ کون سی گاڑی استعمال کر رہے ہیں، اور عوام کی بھی اس پر نظر رہتی ہے۔ نیتن نوین نے یہ بھی واضح کیا کہ دہلی کی نظر اس بات پر بھی ہے کہ ارکانِ اسمبلی دن میں کتنی بار چائے یا کافی پیتے ہیں۔
اس کے ساتھ ہی وزارتی عہدے کے غلط استعمال سے متعلق بھی نیتن نے وزراء کے ساتھ میٹنگ میں واضح پیغام دیا ہے۔ ذرائع کے مطابق، بی جے پی کے آل انڈیا صدر نے کہا کہ کسی وزیر کے عہدے کا غلط استعمال ان کے جاننے والوں یا خاندان کے افراد کی جانب سے نہیں ہونا چاہیے۔ انہوں نے یہ سوال بھی اٹھایا کہ بعض وزراءکے دفاتر میں ان کے خاندان کے افراد کیوں جاکر بیٹھے رہتے ہیں۔
اس کے بعد انہوں نے رویے اور نظم و ضبط کے حوالے سے سخت پیغام دیا۔ انہوں نے واضح ہدایات دیتے ہوئے کہا کہ سب کو پارٹی کے ساتھ تال میل برقرار رکھتے ہوئے کام کرنا ہوگا۔
دوسری جانب پوجا کے تہوار کے بعد ریاست میں کولکاتا، ہاوڑہ سمیت کئی میونسپل کارپوریشنوں اور بلدیاتی اداروں کے انتخابات ہونے ہیں۔ ان انتخابات کو ہدف بنا کر بنگال بی جے پی کی قیادت پوری تیاری کے ساتھ میدان میں اتر گئی ہے۔ امیدواروں کے طور پر کئی ناموں کو لے کر قیاس آرائیاں جاری ہیں۔
تاہم اس معاملے میں بی جے پی کے آل انڈیا صدر کا واضح پیغام ہے کہ بلدیاتی انتخابات میں امیدواروں کو ٹکٹ دینے کے معاملے میں ارکانِ اسمبلی کی سفارش نہیں چلے گی۔ پارٹی جن لوگوں کو اہل سمجھے گی، صرف انہیں ہی بلدیاتی انتخابات میں ٹکٹ دیا جائے گا۔
اس کے علاوہ نیتن نے رہنماو¿ں اور وزراء کو عام لوگوں کے ساتھ تصویر کھنچوانے کے معاملے میں بھی محتاط رہنے کو کہا ہے۔ ارکانِ اسمبلی کو اپنے اسمبلی حلقے کے دفتر میں وقت دینے کی ہدایت دی گئی ہے۔ انہوں نے یہ بھی کہا کہ ارکانِ اسمبلی زبردستی درگا پوجا کمیٹیوں میں شامل نہ ہوں۔ اگر کوئی پوجا کمیٹی انہیں کوئی عہدہ دینا چاہتی ہے تو وہ اس عہدے کو قبول کر سکتے ہیں۔
بی جے پی صدر نے خبردار کیا کہ اگر کوئی رکنِ اسمبلی غیر اخلاقی سرگرمیوں میں ملوث پایا گیا تو اسے پارٹی سے نکالنے میں بھی زیادہ وقت نہیں لگے گا۔
اس کے علاوہ تبادلے اور تقرری کے معاملات میں کسی قسم کی سفارش نہ کرنے اور مستحقین سے کسی بھی طرح رقم لینے کی شکایت نہ آنے کے حوالے سے بھی ریاستی قیادت نے میٹنگ میں ارکانِ اسمبلی کو خبردار کیا ہے۔