بنگال کے جن زی ووٹرز پر نظر، یوتھ مورچہ کی ’نئی‘ قیادت کے ساتھ نیتن کی گفتگو
جن زی کی طاقت کا خوب اندازہ ہو چکا ہے۔ خاص طور پر مرکز کی حکمراں جماعت نے ان کے احتجاج کی شدت کو اچھی طرح محسوس کیا ہے۔ دہلی میں جن زی کی تحریک کے نتیجے میں مرکزی وزیرِ تعلیم کو استعفیٰ تک دینا پڑا۔ اس سے سبق لیتے ہوئے مرکزی قیادت نوجوان ووٹروں کے رجحانات کو سمجھنے کے لیے سرگرم ہو گئی ہے۔ دو روزہ بنگال دورے پر آئے بی جے پی کے آل انڈیا صدر نیتن نوین بھی اس معاملے کو خاص اہمیت دے رہے ہیں۔ ذرائع کے مطابق، پیر کو وہ جن زی کے معاملے پر ایک میٹنگ کریں گے۔ اس میں ریاستی بی جے پی یوتھ مورچہ کے نئے صدر امیت سامنت بھی موجود ہوں گے۔
ریاست میں بی جے پی حکومت قائم ہونے کے بعد نیتن نوین پہلی مرتبہ بنگال کے دورے پر آئے ہیں۔ اتوار کو انہوں نے پورا دن ریاستی تنظیم کے ساتھ اہم اجلاسوں میں گزارا۔ ان کا کہنا ہے کہ صرف اقتدار حاصل کرنا ہی کافی نہیں، بلکہ اقتدار کو برقرار رکھنے کے لیے تنظیم میں اب بھی کچھ اصلاحات کی ضرورت ہے۔ انہوں نے پارٹی کے ارکانِ اسمبلی کو خصوصی پیغام بھی دیا۔ آل انڈیا صدر نے آئندہ بلدیاتی انتخابات کی حکمتِ عملی بھی طے کر دی ہے۔ اتوار کو وزیر اعلیٰ شبھیندو ادھیکاری سے لے کر پارٹی کے ہر رکن نے نیتن کی ’کلاس‘ کو پوری توجہ سے سنا اور اپنی فوری ذمہ داریوں کو سمجھا۔
نیتن نوین کے پیر کے روز بھی کئی پروگرام ہیں۔ ذرائع کے مطابق، اس دن وہ تنظیم کے یوتھ مورچہ کے ساتھ اجلاس کریں گے۔ حال ہی میں ریاستی تنظیم میں تبدیلیاں کی گئی ہیں۔ اندرنیل کھاں کی جگہ یوتھ مورچہ کے نئے صدر امتا کے نو منتخب رکنِ اسمبلی امیت سامنت کو بنایا گیا ہے۔ ان کے ساتھ نیتن نوین آج ’یوا بھارت سمواد‘ نامی پروگرام میں شرکت کرنے والے ہیں۔ مقصد صرف ایک ہے: سیاسی طور پر باشعور اور فعال جن زی ووٹروں کے رجحانات کو سمجھنا۔
اس سے قبل آر ایس ایس کے سربراہ موہن بھاگوت بھی نوجوانوں کے ساتھ بات چیت کر چکے ہیں۔ بھاگوت کا خیال تھا کہ نوجوان نسل کی مخالف یا مختلف سیاسی رائے رکھنے والوں کو دور کرنے کے بجائے ان کے ساتھ خیالات کا تبادلہ زیادہ مو¿ثر طریقہ ہے۔ اب بی جے پی کے آل انڈیا صدر بھی اسی راستے پر چلتے ہوئے نوجوان ووٹروں سے براہِ راست بات چیت کرنے کی کوشش کر رہے ہیں۔