کرائے کے اکاونٹس کے ذریعے ملک بھر میں سائبر فراڈ! پارک اسٹریٹ کے بینک میں ’اصل اکاونٹس‘ کا پولیس کو سراغ
پولیس کو پارک اسٹریٹ کے ایک بینک میں کئی ’مول اکاونٹس‘ یعنی کرائے پر لیے گئے بینک اکاونٹس کا سراغ ملا ہے۔ الزام ہے کہ ان اکاونٹس کا استعمال کرتے ہوئے ملک بھر میں تقریباً 2 کروڑ 44 لاکھ روپے کی سائبر دھوکہ دہی کی گئی۔ پولیس نے نامعلوم ملزمان کے خلاف مقدمہ درج کر لیا ہے۔ دھوکہ دہی کے لیے استعمال کیے گئے ان اکاونٹس کے پیچھے موجود افراد کی تلاش جاری ہے۔
پولیس نے بتایا کہ پارک اسٹریٹ کی ایک کمرشل عمارت میں واقع نجی بینک کی شاخ میں کئی اکاوٹس کھولے گئے تھے۔ نیشنل سائبر کرائم رپورٹنگ پورٹل پر ملک کے مختلف علاقوں کے رہائشیوں کی جانب سے درج کرائی گئی شکایات کی جانچ کے دوران پولیس کی نظر اس معاملے پر پڑی۔
پولیس کو معلوم ہوا کہ ان اکاونٹس کے ذریعے مختلف قسم کے سائبر فراڈ کیے جاتے تھے۔ کبھی جعلی سرمایہ کاری کا لالچ دے کر، تو کبھی شیئر ٹریڈنگ کے نام پر لوگوں سے رقم وصول کی جاتی تھی۔ اس کے علاوہ ڈیجیٹل گرفتاری کا خوف دکھا کر، جعلی کے وائی سی اپ ڈیٹ کے نام پر یا خود کو بینک افسر ظاہر کرکے عام لوگوں سے رقم ہتھیانے کا الزام بھی ہے۔
ابتدائی تفتیش میں پولیس کو معلوم ہوا کہ پارک اسٹریٹ کے مذکورہ بینک اکاونٹس میں تقریباً 2 کروڑ 44 لاکھ 83 ہزار روپے کی لین دین ہوئی ہے۔ ملک کے مختلف بینک اکاونٹس سے رقم ان اکاونٹس میں منتقل کی گئی۔ الزام ہے کہ بعد میں سائبر فراڈ سے حاصل کی گئی اس بڑی رقم کو دوسرے اکاونٹس میں منتقل کر دیا گیا۔
تفتیش کے دوران پولیس بینک اکاونٹس کی لین دین کی تفصیلات، ڈیجیٹل شواہد سمیت مختلف پہلووں کی جانچ کر رہی ہے۔ یہ معلوم کرنے کی کوشش کی جا رہی ہے کہ یہ اکاونٹس کس نے کھولے تھے اور انہیں کون چلاتا تھا۔ پولیس نے بتایا کہ اس بات کی بھی تحقیقات کی جا رہی ہے کہ کہیں جعلی دستاویزات کے ذریعے تو یہ بینک اکاونٹس نہیں کھولے گئے تھے۔