طلبہ کے ساتھ مڈ ڈے میل کھایا تھا، اسی اسکول کو وزیر اعلیٰ کا پوجا کا تحفہ، خاتون کارکنوں کو رقم اور ساڑیاں ملیں
منگل کو ہاو¿ڑہ کے بیانترا مدھوسودن پال چودھری ہائی اسکول میں وزیر اعلیٰ شوبھندو ادھیکاری نے ’سارتھی‘ سائیکلوں کی تقسیم کا آغاز کیا تھا۔ انہوں نے مدھوسودن اسکول کے علاوہ راج لکشمی گرلز اسکول اور لیلوہ شکشا نیکیتن کے طلبہ و طالبات میں بھی سائیکلیں تقسیم کی تھیں۔ وزیر اعلیٰ نے طلبہ کے ساتھ بیٹھ کر مڈ ڈے میل بھی کھایا تھا۔ انہوں نے مڈ ڈے میل کے انتظامات کے لیے اسکول کی تعریف بھی کی تھی۔ اس کے بعد بدھ کو وزیر اعلیٰ نے بیانترا اور دونوں دیگر اسکولوں کے طلبہ و طالبات کے لیے روہو مچھلی اور رس گلے بھیجے۔ ساتھ ہی مدھوسودن اسکول کی مڈ ڈے میل کی 6 خاتون کارکنوں کے لیے پوجا کا تحفہ بھی بھیجا۔ انہیں ساڑیاں اور 500 روپے فی کس بھیجے گئے۔ انہوں نے وزیر اعلیٰ کا شکریہ ادا کیا۔
اسکول ذرائع کے مطابق، بدھ کو وزیر اعلیٰ نے 850 عدد روہو مچھلیاں بھیجیں۔ اس کے ساتھ رس گلے بھی تھے۔ مچھلی مدھوسودن پال چودھری اسکول میں ہی پکائی گئی۔ وہاں راج لکشمی گرلز اسکول اور لیلوہ شکشا نیکیتن کے طلبہ و طالبات اور اساتذہ کو بھی مدعو کیا گیا۔
بدھ کو اسکول پہنچنے پر دیکھا گیا کہ بیانترا مدھوسودن پال چودھری اسکول کے مڈ ڈے میل کے کمرے میں وزیر اعلیٰ کی بھیجی ہوئی روہو مچھلی کی کالیا تیار کی جا رہی ہے۔ مڈ ڈے میل میں چاول، سبزی اور مچھلی کی کالیا کے ساتھ وزیر اعلیٰ کی جانب سے بھیجے گئے رس گلے بھی شامل تھے۔ تینوں اسکولوں کے اساتذہ اور طلبہ و طالبات نے ایک ساتھ بیٹھ کر کھانا کھایا۔
اس سلسلے میں بیانترا مدھوسودن پال چودھری اسکول کے ہیڈ ماسٹر نے بتایا، ”بدھ کی صبح ہی وزیر اعلیٰ کے دفتر سے اطلاع دی گئی کہ وزیر اعلیٰ خوش ہو کر تینوں اسکولوں کے لیے مچھلی اور رس گلے بھیج رہے ہیں۔ کچھ دیر بعد وزیر اعلیٰ کے دفتر سے روہو مچھلی اور مٹھائیاں اسکول پہنچ گئیں۔ میں نے وزیر اعلیٰ کا شکریہ ادا کرتے ہوئے ایک ویڈیو پیغام ان کے دفتر کو بھیجا ہے۔