چیک باؤنس معاملہ: تہاڑ جیل میں قید راجپال یادو کی ضمانت مسترد، پیر کو ہوگی دوبارہ سماعت

چیک باؤنس معاملے میں آج راجپال یادو کی ضمانت عرضی پر دہلی ہائی کورٹ میں سماعت ہوئی۔ دونوں فریق کی تمام دلیلوں کو سننے کے بعد عدالت نے معاملے کی سماعت پیر (16 فروری) تک کے لیے ملتوی کر دی ہے۔ اس سے قبل عدالت نے راجپال یادو سے کہا کہ ہم نے آپ کو 2 درجن سے زائد مواقع دیے۔ ساتھی ہی عدالت نے دوسرے فریق سے بھی ضمانت عرضی پر جواب طلب کیا ہے۔ بار اینڈ بنچ کے مطابق سماعت کے دوران عدالت نے دوسرے فریق سے بھی ضمانت عرضی پر جواب داخل کرنے کو کہا۔ عدالت نے کہا ہے کہ ’’شکایت کنندہ کو جواب داخل کرنا ہوگا۔ جب میں فائل دیکھ رہا تھا تو مجھے کئی ایسی باتیں معلوم ہوئیں جن کے بارے میں ہمیں علم بھی نہیں تھا۔ انہوں نے پہلے حکم کو سپریم کورٹ میں چیلنج کیا تھا، لیکن سپریم کورٹ نے انہیں کوئی راحت نہیں دی۔ خیر ہم اس پر پیر کو سماعت کریں گے۔‘‘ سماعت کے دوران دہلی ہائی کورٹ نے راجپال یادو کی جانب سے 3 کروڑ روپے سے زائد رقم ادا کرنے کی یقین دہانی پر گہری تشویش کا اظہار کرتے ہوئے کہا کہ معاملہ کافی وقت سے زیر التوا ہے۔ ’منٹ‘ کی رپورٹ کے مطابق عدالت نے بتایا کہ نظر ثانی کی سماعت اور مصالحت کی کارروائی کے دوران کئی بار وعدے کیے جانے کے باوجود راجپال یادو نے تقریباً 30-25 بار سماعت ملتوی کروائی اور واجب الادا رقم ادا نہیں کی۔ راجپال یادو کے وکیل نے عبوری ضمانت کی گزارش کرتے ہوئے عدالت کو بتایا کہ اداکار اپنے بڑے بھائی کی بیٹی کی شادی میں شامل ہونا چاہتے ہیں۔ ساتھ ہی وکیل نے بنچ کو یہ بھی یقین دلایا کہ راجپال یادو بقایا رقم جمع کرنے کے لیے تیار ہیں۔ انہیں بالی ووڈ انڈسٹری کے اراکین اور دیگر افراد سے مالی مدد حاصل ہوئی ہے۔

Source: social media