بزرگ فریادی منت سماجت کرتا رہا، میز پر پاؤں رکھ کر موبائل میں مصروف خاتون کانسٹیبل،عوامی غصے کے بعد معطل

راجستھان کے ضلع ڈونگرپور کے بچھیواڑا تھانے سے سامنے آنے والی ایک شرمناک تصویر نے پولیس کی حساسیت کے تمام دعووں کی قلعی کھول دی ہے۔ عوام کی خدمت کا دعویٰ کرنے والی پولیس عام شہریوں کے ساتھ کس رویے کا مظاہرہ کرتی ہے، اس کی واضح جھلک اس وائرل تصویر میں دیکھی جا سکتی ہے۔تصویر میں ایک خاتون پولیس اہلکار کسی “مہارانی” کے انداز میں تھانے کو اپنا ڈرائنگ روم سمجھ کر بیٹھی ہوئی نظر آتی ہیں، جبکہ ان کے سامنے ایک بے بس بزرگ فریادی انصاف کی امید لیے بیٹھا ہے۔ سوشل میڈیا پر وائرل ہونے والی اس تصویر نے پولیس کے رویے پر سنگین سوالات کھڑے کر دیے ہیں۔ خاتون کانسٹیبل رینا گرگ کرسی پر پیچھے کی طرف جھک کر بیٹھی تھیں اور دونوں پاؤں سرکاری میز پر رکھے ہوئے تھیں۔ ان کے سامنے ایک کمزور اور عمر رسیدہ شخص اپنی فریاد لے کر بیٹھا تھا، جو تھانے میں انصاف کی امید سے آیا تھا، مگر اسے مبینہ طور پر بے اعتنائی اور تذلیل کا سامنا کرنا پڑا۔بزرگ فریادی اپنی تکلیف بیان کرنے کی کوشش کرتا رہا، لیکن خاتون کانسٹیبل نے اس کی طرف دیکھنا بھی گوارا نہ کیا اور مسلسل اپنے موبائل فون میں مصروف رہیں۔ جیسے ہی یہ تصویر سوشل میڈیا پر وائرل ہوئی، عوام میں شدید غم و غصہ پھیل گیا۔ ٹیکس دہندگان نے پولیس محکمہ سے سوال کیا کہ کیا تھانے متاثرہ افراد کی مدد کے لیے ہیں یا پھر غیر ذمہ دار اہلکاروں کے آرام کرنے اور اپنی دھونس جمانے کے لیے؟سوشل میڈیا صارفین کا کہنا تھا کہ اس طرح کا رویہ عوام کا پولیس پر اعتماد بری طرح مجروح کرتا ہے۔ عوامی ردعمل کے بعد ڈونگرپور کے سپرنٹنڈنٹ آف پولیس (ایس پی) منیش کمار نے فوری مداخلت کی۔ انہوں نے اس رویے کو سنگین نظم و ضبط کی خلاف ورزی اور پولیس کے وقار کے منافی قرار دیتے ہوئے خاتون کانسٹیبل رینا گرگ کو فوری طور پر معطل (سسپنڈ) کر دیا اور واقعے کی محکمانہ تحقیقات کا حکم دے دیا۔ اگرچہ کارروائی کر دی گئی ہے، لیکن سوال اب بھی برقرار ہے کہ کیمرے میں یہ منظر قید ہونے سے پہلے نہ جانے کتنے فریادی روزانہ اسی طرح کے رویے کا شکار ہوتے رہے ہوں گے۔

Source: Social Media