بی کے ہری پرساد کرناٹک پردیش کانگریس کمیٹی کے نئے صدر مقرر

بنگلورو، 3 جون : کانگریس کے سینئر رہنما بی کے ہری پرساد کو کرناٹک پردیش کانگریس کمیٹی (کے پی سی سی) کا نیا صدر مقرر کیا گیا ہے ۔بی کے ہری پرساد، ڈی کے شیوکمار کی جگہ لیں گے جنہیں ریاست کا نیا وزیرِ اعلیٰ مقرر کیے جانے کے بعد پارٹی کے ریاستی صدر کے عہدے سے سبکدوش کر دیا گیا ہے ۔ یہ تنظیمی تبدیلی ڈی کے شیوکمار کے بدھ کے روز کرناٹک کے وزیرِ اعلیٰ کے طور پر حلف لینے کے فوراً بعد سامنے آئی ہے ۔ ریاستی حکومت میں اس بڑی سیاسی تبدیلی کے باعث پارٹی کی داخلی تنظیمی منتقلی کے تحت ریاستی کانگریس یونٹ میں قیادت کی تبدیلی ضروری سمجھی گئی۔ بی کے ہری پرساد اس وقت کرناٹک قانون ساز کونسل کے رکن ہیں اور ان کی موجودہ مدتِ رکنیت اسی ماہ ختم ہونے والی ہے ۔ وہ کانگریس کے ایک تجربہ کار اور بااثر رہنما سمجھے جاتے ہیں، جنہیں تنظیمی اور پارلیمانی امور میں طویل تجربہ حاصل ہے ۔ وہ اس سے قبل راجیہ سبھا کے رکن بھی رہ چکے ہیں اور آل انڈیا کانگریس کمیٹی میں متعدد اہم ذمہ داریاں انجام دے چکے ہیں۔ پارٹی قیادت کو امید ہے کہ ان کی تقرری سے کرناٹک میں کانگریس تنظیم مزید مضبوط ہوگی اور حکومت و تنظیم کے درمیان بہتر تال میل قائم ہوگا۔

Source: UNI NEWS