ممبئی ٢٢ اکتوبر :ریاست میں اسمبلی انتخابات کا رنگ دن بدن بڑھتا جا رہا ہے۔ سیٹ الاٹمنٹ، امیدواروں کی درخواستوں کا عمل شروع ہو گیا ہے۔ اس دوران پارٹی کے حامیوں کی جانب سے انتخابی مہم بھی شروع کر دی گئی ہے۔ دریں اثنا، ممبئی کے کئی حصوں میں انتخاب کا یہ رنگ فرقہ پرستی کا استعارہ بنتا جارہا ہے۔ اتر پردیش کے وزیر اعلیٰ یوگی آدتیہ ناتھ کا نعرہ ’’ بٹیں گے تو کٹیں گے‘‘ جو ہریانہ کے اسمبلی انتخابات میں بھی استعمال ہوا تھا۔ اب یہ نعرہ مہاراشٹر کے اسمبلی انتخابات میں بھی سنائی دے رہا ہے۔ واقف کار ذرائع کے مطابق بی جے پی کے حامی وشوبندھو رائے نے مختلف مقامات پر یہ پوسٹر لگائے ہیں۔ اس حوالے سے ان کا کہنا تھا کہ ’مخالفین کی جانب سے الزامات اور جوابی الزامات کا سلسلہ شروع ہوگیا ہے اور ہم ان کا جواب دے رہے ہیں۔ شمالی ہندوستان کے شہری یوگی آدتیہ ناتھ کا احترام کرتے ہیں اور ان کے نعرے پر بھی یقین رکھتے ہیں۔ چنانچہ ہم نے مہاراشٹر میں بھی اس طرح اپوزیشن کے ہتھکنڈوں کا جواب دینا شروع کر دیا ہے۔ ہم نے دیکھا کہ کس طرح ہریانہ کے لوگوں نے بھارتیہ جنتا پارٹی کا ساتھ دیا۔ ہم مہاراشٹر میں بھی یہی حربہ استعمال کرنے جا رہے ہیں، اسی طرح، بی جے پی کے ترجمان اجیت چوان نے اس بارے میں بتایا، "لوک سبھا انتخابات میں، ایک برادری نے پوری طاقت کے ساتھ ایک جماعت کی حمایت کی تھی یہ ملک اور دنیا نے دیکھا ہے۔ یوگی آدتیہ ناتھ نے حقیقت دنیا کے سامنے لائی ہے۔ مجھے امید ہے کہ ہندو برادری اس نعرے کو سنے گی۔ بی جے پی نے اتوار کو 99 حلقوں کے امیدواروں کا اعلان کیا۔ دیگر جماعتوں کے امیدواروں کا ابھی اعلان نہیں کیا گیا۔ مہاراشٹر میں ووٹنگ ایک ہی مرحلے میں 20 نومبر کو ہوگی اور ووٹوں کی گنتی 23 نومبر کو ہوگی۔ اسمبلی انتخابات کے لیے درخواستیں داخل کرنے کا عمل آج منگل سے شروع ہو رہا ہے۔ تاہم، مہایوتی اور مہاوکاس اگھاڑی ابھی تک سیٹوں کی تقسیم پر متفق نہیں ہو سکے ہیں۔ بی جے پی کی فہرست کے اعلان کے بعد پارٹی کے ناراض لیڈروں نے بغاوت کا منصوبہ بنایا ہے۔ عظیم اتحاد میں بی جے پی، شیو سینا (شندے)، این سی پی (اجیت پوار) کے درمیان سیٹوں کی تقسیم پر ابھی تک کوئی معاہدہ نہیں ہوا ہے۔ کہا جاتا ہے کہ سیٹوں کی تقسیم رک گئی تھی کیونکہ بی جے پی وزیر اعلی شندے کی شیوسینا کو 80 سے زیادہ سیٹیں دینے کو تیار نہیں۔

Source: uni news