حیدرآباد۔5جولائی : انگلینڈ کے خلاف حالیہ دوسرے ٹسٹ میچ میں میدان میں پیش آئے ایک جذباتی لمحہ نے مداحوں کے دل جیت لیے۔ کپتان شبمن گل اور فاسٹ بولر محمد سراج کے درمیان ٹیم اسپرٹ، رفاقت اور حوصلہ افزائی پر مبنی ایک چھوٹا سا مکالمہ سوشل میڈیا پر زبردست توجہ کا مرکز بن گیا ہے۔ پانچویں دن، جب میچ فیصلہ کن موڑ پر پہنچ چکا تھا، اور انگلش بلے باز مزاحمت دکھا رہے تھے، ہندوستان کے فیلڈرس مسلسل کیچ چھوڑ رہے تھے اور گیند باز تھکے ہوئے دکھائی دے رہے تھے، ایسے میں کپتان شبمن گل نے ایک موقع پر فیلڈنگ پوزیشن سے محمد سراج کو حوصلہ دیتے ہوئے پکارا: "بسم اللہ کر کے ڈالو سراج بھائی!" یہ منظر کیمروں کی آنکھ سے محفوظ ہو گیا اور بعد ازاں جیسے ہی ویڈیو کلپ سوشل میڈیا پر سامنے آیا، دیکھتے ہی دیکھتے وائرل ہو گیا۔ محمد سراج نے میچ کے دوسرے اننگز میں شاندار گیند بازی کا مظاہرہ کیا۔ لائن و لینتھ، ریورس سوئنگ اور باؤنسرز کے ذریعہ انہوں نے انگلش بلے بازوں کو بار بار پریشان کیا، اس ساری صورتِ حال میں شبمن گل کی یہ آواز ۔ "بسم اللہ کر کے ڈالو" نہ صرف ایک سادہ جملہ تھا بلکہ ایک قائد کی طرف سے حوصلہ افزائی کا وہ پیغام تھا جس میں ٹیمی روح، عقیدت، اور اعتماد کی جھلک تھی۔ شبمن گل کی طرف سے "بسم اللہ" کہنا محض ایک جذباتی جملہ نہیں بلکہ ایک ثقافتی اور روحانی اشارہ بھی تھا۔ "بسم اللہ" کہنا کسی کام کو نیک نیتی، دعا اور اعتماد کے ساتھ شروع کرنے کی علامت ہے۔ کپتان کی یہ صدا دراصل محمد سراج کے ایمان اور حوصلہ سے جُڑی ایک گونج تھی، جو ٹیم کے اندرونی ربط اور باہمی عزت کی عکاسی کرتی ہے۔ ویڈیو کے وائرل ہوتے ہی ٹوئٹر، انسٹاگرام اور یوٹیوب پر صارفین نے شبمن گل کی اس اپیل کو خوب سراہا۔ "گل کا یہ اندازِ قیادت دل جیتنے والا ہے"، ایک صارف نے لکھا، "ایسا لگتا ہے جیسے بھائی بھائی کو کہہ رہا ہو، یقین رکھ، بس نیت صاف رکھ!" کئی معروف کرکٹرز اور تبصرہ نگاروں نے بھی اس ویڈیو کو شیئر کیا اور اسے ٹیم کی ٹیم اسپرٹ کا خوبصورت مظاہرہ قرار دیا۔ اگرچہ سراج نے اس لمحہ پر کوئی سرکاری بیان نہیں دیا، مگر ان کے چہرے پر اُس وقت جو اعتماد کی جھلک تھی، وہ بہت کچھ کہہ گئی۔ ماہرین کے مطابق یہ چھوٹے چھوٹے لمحے ٹیم کو متحد رکھتے ہیں، خاص طور پر جب نتائج توقعات کے خلاف ہوں۔ شبمن گل کا "بسم اللہ کر کے ڈالو سراج بھائی" کہنا، اس ہار میں بھی ایک حوصلہ افزا اور خوشنما لمحہ بن گیا۔ یہ جملہ اب نہ صرف کرکٹ حلقوں بلکہ عام نوجوانوں کے لیے بھی ایک طرح کی ترغیب بن چکا ہے کہ ہر چیلنج کے آغاز سے قبل نیت کو صاف رکھ کر، اعتماد کے ساتھ قدم بڑھاؤ... بسم اللہ کر کے ڈالو!

Source: uni urdu news service