بشنوئی گینگ کی ’خطرناک بیویاں‘، انڈر ورلڈ کی وہ خواتین جو پراسرار انداز میں جرائم کا جال پھیلاتی ہیں

انڈیا کے بدنام زمانہ گینگسٹر لارنس بشنوئی کے کرائم سنڈیکیٹ میں جہاں مردوں کا غلبہ رہا ہے وہیں اب تفتیش میں ایسے انکشافات سامنے آئے ہیں کہ پسِ پردہ خواتین کا ایک نیٹ ورک بھتہ خوری، منشیات کی سمگلنگ اور یہاں تک کہ قتل و غارت کے منصوبوں کو کنٹرول کر رہا ہے۔ انڈیا میں منظم جرائم کی تاریخ پر نظر ڈالیں تو یہ ہمیشہ مردوں کے گرد گھومتی نظر آئی ہے لیکن حالیہ برسوں میں ہونے والی گرفتاریوں نے دہلی اور پنجاب کی پولیس کو چونکا دیا ہے۔ این ڈی ٹی وی کی ایک رپورٹ کے مطابق لارنس بشنوئی اور اس کے حلیف گروہوں میں خواتین صرف ’ساتھی‘ نہیں بلکہ فیصلہ کُن عہدوں پر فائز ہو چکی ہیں۔ ان میں سے کچھ نے اپنے شوہروں یا پارٹنرز کی موت یا قید کے بعد کمان سنبھالی جبکہ کچھ نے اپنی مجرمانہ صلاحیتوں کی بنیاد پر اس ’سلطنت‘ میں جگہ بنائی۔ پولیس ریکارڈ میں ’میڈم زہر‘ کے نام سے مشہور خوشنما انصاری عرف نیہا اس گینگ کا ایک ایسا ہی چہرہ ہیں جن کا نام سنگین ترین جرائم سے جُڑا ہوا ہے۔ راجستھان کے علاقے جھنجھنو کی رہائشی پوجا شرما کی کہانی کسی فلمی سکرپٹ سے کم نہیں۔ مارچ 2024 میں چندی گڑھ سے گرفتار ہونے والی پوجا کے ہاتھ پر ‘AK-47’ کا ٹیٹو بنا ہوا ہے اور وہ تفتیش کاروں کو صاف بتاتی ہے کہ وہ ایک ’گینگسٹر‘ بننا چاہتی تھی۔ گھریلو جھگڑے کے بعد خاندان چھوڑنے والی پوجا کو ہنی نامی مجرم کے ذریعے روہت گودارا (بشنوئی کے قریبی ساتھی) سے ملوایا گیا۔ اسے موبائل اور رقم دے کر چندی گڑھ بھیجا گیا جہاں گولڈی برار کے حکم پر اس نے اور اس کے ساتھیوں نے وکلا کے لباس خریدے۔ منصوبہ یہ تھا کہ عدالت کے اندر حریف گینگسٹر بپی رانا کو ’وکیل‘ کے روپ میں قتل کیا جائے۔ پوجا کو اس کارروائی میں شوٹر کا کردار سونپا گیا تھا۔ ہاشم بابا بشنوئی نیٹ ورک کا کلیدی مہرہ ہے۔ اس کی تیسری بیوی زویا خان کو جب گرفتار کیا گیا تو ان کے قبضے سے ایک کروڑ روپے مالیت کی ہیروئن برآمد ہوئی۔ 33 سال کی زویا پر الزام ہے کہ وہ اپنے شوہر کے جیل جانے کے بعد اس کا پورا بھتہ خوری اور منشیات کا نیٹ ورک چلا رہی تھیں۔ دہلی پولیس کے ذرائع زویا کا موازنہ داؤد ابراہیم کی بہن ہسینہ پارکر سے کرتے ہیں۔ زویا سوشل میڈیا پر بے حد فعال تھیں جہاں وہ ڈیزائنر ملبوسات اور مہنگی گاڑیوں کے ساتھ اپنی تصاویر اپ لوڈ کر کے ایک شاہانہ تأثر قائم رکھتی تھیں جس کا مقصد اثر و رسوخ پیدا کرنا تھا۔ ذِکرہ شمال مشرقی دہلی کے علاقے سیلوم پور کی رہائشی ذکرہ کے بارے میں پولیس کا کہنا ہے کہ وہ پستول لہرانے اور سوشل میڈیا پر دھمکیاں دینے میں ماہر ہے۔ وہ ایک ایسے گروہ کی سربراہی کر رہی ہے جو مخالفین کو جان سے مارنے کی دھمکیاں دیتا ہے۔ ذکرہ کا نام ایک 17 سال کے نوجوان کنال کے قتل میں بھی سامنے آیا ہے، جس پر حملہ ذکرہ کے بھائی ساحل نے کیا تھا۔ انورادھا چودھری عرف ’میڈم منز‘ بشنوئی گینگ کی سب سے زیادہ پڑھی لکھی اور شاطر خاتون سمجھی جاتی ہیں۔ بی سی اے کی ڈگری رکھنے والی انورادھا پہلے اپنے شوہر کے ساتھ شیئر ٹریڈنگ کا بزنس کرتی تھیں۔ کاروبار ڈوبنے اور قرض بڑھنے کے بعد انہوں نے جرائم کی دنیا میں قدم رکھا۔ انورادھا کے بارے میں مشہور ہے کہ انہوں نے گینگسٹر آنند پال سنگھ کی شخصیت ہی بدل ڈالی؛ انہیں انگریزی سکھائی اور روایتی کپڑوں کے بجائے سوٹ اور ہیٹ پہننے پر آمادہ کیا۔ بدلے میں انہوں نے اے کے 47 چلانے کی تربیت حاصل کی۔ آنند پال کے اِنکاؤنٹر کے بعد وہ لارنس بشنوئی نیٹ ورک کے ذریعے دہلی منتقل ہوئیں اور گینگسٹر کالا جٹھیڑی کے ساتھ مل کر نیٹ ورک چلانے لگیں۔ انو دھنکر گینگسٹر ہیمانشو بھاؤ کی دوست انو دھنکر پر دہلی کے ایک ’برگر کنگ‘ آؤٹ لیٹ میں ہونے والے مشہور قتل کا الزام ہے۔ انو دھنکر نے مبینہ طور پر سوشل میڈیا پر فرضی پروفائل بنا کر مقتول امن جون سے دوستی کی اور اسے ملاقات کے بہانے برگر کنگ بلایا جہاں پہلے سے موجود شوٹرز نے اس پر 40 گولیاں برسا دیں۔ انو روہتک کی رہائشی ہے اور گرفتاری سے بچنے کے لیے نیپال بارڈر تک جا پہنچی تھی۔ ان خواتین کی کہانیاں ظاہر کرتی ہیں کہ انڈین انڈر ورلڈ میں اب طاقت کا توازن بدل رہا ہے۔ جہاں لارنس بشنوئی جیسا گینگ سکیورٹی ایجنسیوں کے لیے دردِ سر بنا ہوا ہے وہیں یہ ’لیڈی ڈانز‘ اس سلطنت کو خاموشی اور بے رحمی سے مضبوط کر رہی ہیں۔

Source: scoial media