دبئی، 30 دسمبر : بین الاقوامی کرکٹ کونسل (آئی سی سی) کی طرف سے پیر کو جاری کردہ سال 2024 کے مختلف فارمیٹس میں بہترین مرد اور خواتین کرکٹرز کی فہرست میں ہندوستان کے تیز گیند باز جسپریت بمراہ، سری لنکا کے چماری اٹا پٹو، جنوبی افریقہ کی لورا وولفارٹ اور اسمرتی مندھانا کا نام بھی شامل ہے۔ عالمی ٹیسٹ چیمپئن شپ میں شاندار کارکردگی کا مظاہرہ کرنے والے ہندوستانی تیز گیند باز جسپریت بمراہ کو آئی سی سی کی جانب سے آج یہاں جاری مختلف فارمیٹس کے لیے بہترین کرکٹرز کی فہرست میں منتخب کیا گیا ہے۔ بمراہ نے جون میں ہندوستان کے ٹی 20 ورلڈ کپ جیتنے میں اہم کردار ادا کیا تھا۔ اس کے لیے انہیں 'پلیئر آف دی ٹورنامنٹ' سے نوازا گیا تھا۔ انہوں نے اس ٹورنامنٹ میں 8.24 کی عمدہ اوسط سے 15 وکٹیں حاصل کیں۔ بمراہ نے 2024 میں ٹیسٹ میں 14.92 کی اوسط سے 71 وکٹیں حاصل کیں، جس میں انہوں نے جنوبی افریقہ، انگلینڈ اور آسٹریلیا کے خلاف شاندار بولنگ کی اور دنیا کے بہترین ٹیسٹ کرکٹر بن گئے اور ہندوستان کے حملے کو رفتار فراہم کی۔ انگلینڈ کے بلے باز ہیری بروک کے لیے بھی یہ سال بہت اچھا رہا۔ انہوں نے تینوں فارمیٹس میں 50 سے زیادہ کی اوسط سے رن بنائے ہیں۔ اس کے علاوہ ان کے ساتھی کھلاڑی جو روٹ کو بھی اس فہرست میں جگہ ملی ہے جس میں انہوں نے 1556 ٹیسٹ رن بنائے ہیں جس میں چھ سنچریاں شامل ہیں۔ بروک نے ٹیسٹ میں 55 کی اوسط سے 1100 رن بنائے جس میں چار سنچریاں شامل تھیں۔ اس میں ملتان میں پاکستان کے خلاف بنائی گئی یادگار ٹرپل سنچری بھی شامل ہے۔ اس میچ میں انہوں نے جو روٹ کے ساتھ 454 رن کی شراکت داری کی تھی۔ اس فہرست میں روٹ بھی شامل ہیں جو حال ہی میں انگلینڈ کے ٹیسٹ میں سب سے زیادہ رن بنانے والے بلے باز بنے ہیں۔ اس فہرست میں آخری نام آسٹریلیائی آل راؤنڈر ٹریوس ہیڈ کا ہے۔ جو ٹی-20 رینکنگ میں سرفہرست ہیں ، انہوں نے تینوں فارمیٹس میں 1400 رن بنائے ہیں۔ سال کی بہترین خواتین کرکٹرز کی فہرست میں سری لنکا کی چماری اٹاپٹو اور جنوبی افریقہ کی لورا وولفارٹ کو جگہ ملی ہے۔ سری لنکا کی کپتان اٹاپٹو نے اس سال تمام فارمیٹس میں 1100 رن بنائے اور 30 ​​وکٹیں حاصل کیں۔ جس میں انہوں نے گھریلو شائقین کے سامنے اپنی ٹیم کو ایشیا کپ کا پہلا ٹائٹل بھی دلایا۔ خواتین کی ون ڈے رینکنگ میں سرفہرست وولفارٹ 2024 شاندار رہا کیونکہ انہوں نے تینوں فارمیٹس میں 1500 رن بنائے اور اپنی ٹیم کو مسلسل دوسری مرتبہ خواتین کے ٹی 20 ورلڈ کپ کے فائنل میں پہنچایا۔ جنوبی افریقہ کو فائنل میں شکست دینے میں نیوزی لینڈ کی امیلیا کیر نے اہم کردار ادا کیا تھا۔ انہوں نے 651 رن اور 43 وکٹیں حاصل کیں، اور خواتین کے ٹی 20 ورلڈ کپ میں پلیئر آف دی ٹورنامنٹ بھی بنیں۔ اس فہرست میں آخری نام آسٹریلیا کی 23 سالہ آل راؤنڈر اینابیل سدرلینڈ کا ہے۔ جنہوں نے فروری میں جنوبی افریقہ کے خلاف خواتین کے ٹیسٹ میں تیز ترین ڈبل سنچری بنائی تھی۔ اس کے علاوہ سال کے آخر میں انہوں نے ہندستان اور نیوزی لینڈ کو شکست دینے میں اہم کردار ادا کیا۔ انہوں نے پورے سال میں 615 رن اور 37 وکٹیں حاصل کیں۔ اس فہرست میں سری لنکا کے کامندو مینڈس کو بھی جگہ ملی ہے جہاں انہوں نے 74.92 کی اوسط سے 1049 رن بنائے۔ اس درمیان وہ اپنے پہلے تمام آٹھ ٹیسٹ میچوں میں نصف سنچریاں بنانے والے پہلے بلے باز بنے۔ اس کے علاوہ انہوں نے 1000 ٹیسٹ رن بنانے کا 75 سال کا ریکارڈ بھی توڑ دیا۔ جیتنے والوں کا اعلان جنوری میں کیا جائے گا۔

Source: uni urdu news service