بجٹ اجلاس کے دوران زبردست ہنگامہ آرائی کے باعث لوک سبھا کی کارروائی دن بھر کے لیے ملتوی

نئی دہلی: پارلیمنٹ کے بجٹ اجلاس کے دوران منگل کے روز لوک سبھا میں اپوزیشن ارکان کے شدید احتجاج اور ہنگامہ آرائی کے باعث ایوان کی کارروائی دن بھر کے لیے ملتوی کر دی گئی۔ صورت حال اس وقت مزید سنگین ہو گئی جب لوک سبھا میں قائد حزب اختلاف راہل گاندھی کی تقریر کے دوران بعض کانگریسی ارکان نے اسپیکر کی کرسی کی جانب کاغذات اچھال دیے، جس کے بعد ایوان میں بدنظمی پھیل گئی۔ ہنگامہ بڑھنے پر اسپیکر نے 8 اراکین پارلیمنٹ کو پورے اجلاس کے لیے معطل کر دیا۔ ادھر بھارتیہ جنتا پارٹی نے اعلان کیا ہے کہ وہ اسپیکر لوک سبھا کے سامنے باضابطہ شکایت درج کرائے گی اور ہنگامہ آرائی میں ملوث ارکان کے خلاف سخت کارروائی کا مطالبہ کرے گی۔ پارٹی کا کہنا ہے کہ پارلیمنٹ جیسے مقدس ادارے میں اس قسم کا طرز عمل ناقابل قبول ہے۔ ایوان سے باہر صحافیوں سے گفتگو کرتے ہوئے راہل گاندھی نے وزیر اعظم نریندر مودی پر سنگین الزامات عائد کیے۔ انہوں نے کہا کہ بھارت-امریکہ تجارتی معاہدے کے ذریعے وزیر اعظم نے ملک کو فروخت کر دیا ہے اور وہ دباؤ میں آ چکے ہیں۔ راہل گاندھی نے کہا: ’’مودی جی گھبراہٹ میں ہیں۔ امریکہ اور بھارت کے درمیان تجارتی معاہدہ جو کئی مہینوں سے رکا ہوا تھا، اسے گزشتہ رات اچانک طے کر لیا گیا۔ ان پر شدید دباؤ ہے۔ وزیراعظم سمجھوتہ کر چکے ہیں اور انہوں نے ملک کے مفادات کو قربان کر دیا ہے۔‘‘ انہوں نے الزام لگایا کہ پہلی بار ایسا ہوا ہے کہ صدر جمہوریہ کے خطاب پر قائد حزب اختلاف کو بولنے نہیں دیا گیا۔

Source: social media