بھارت کی پاکستان پر شدید تنقید، افغانستان پر کیے گئے حملے کو بتایا ’لاپروائی پر مبنی رویہ‘

نئی دہلی: بھارت نے افغانستان کے مشرقی علاقوں میں پاکستانی فضائی حملوں کی سخت مذمت کرتے ہوئے انہیں افغانستان کی خودمختاری کی خلاف ورزی اور علاقائی امن و استحکام کے لیے خطرہ قرار دیا ہے۔ وزارتِ خارجہ کی جانب سے جاری بیان میں کہا گیا کہ ان حملوں میں خواتین اور بچوں سمیت متعدد عام شہری ہلاک ہوئے، جو پاکستان کے ’’لاپروائی پر مبنی رویے‘‘ کی عکاسی کرتے ہیں۔ بیان میں کہا گیا ’’بھارت افغانستان کی سرزمین پر پاکستان کے فضائی حملوں کی شدید مذمت کرتا ہے، جن کے نتیجے میں خواتین اور بچوں سمیت کئی عام شہری ہلاک ہوئے ہیں۔ یہ جارحیت افغانستان کی خودمختاری پر حملہ اور خطے کے امن و استحکام کے لیے براہِ راست خطرہ ہے۔‘‘ وزارت خارجہ نے اپنے بیان میں کہا کہ یہ واقعہ پاکستان کے طرزِ عمل کا تسلسل ہے۔ بیان کے مطابق ’’یہ پاکستان کے مسلسل غیر ذمہ دارانہ رویے اور اپنی اندرونی ناکامیوں سے توجہ ہٹانے کے لیے سرحد پار تشدد کا سہارا لینے کی بے سود کوشش کی عکاسی کرتا ہے۔‘‘ بھارت نے حملوں میں ہلاک ہونے والوں کے اہلِ خانہ سے تعزیت کا اظہار کرتے ہوئے زخمیوں کی جلد صحت یابی کی دعا کی اور افغانستان کی خودمختاری اور علاقائی سالمیت کی اپنی غیر متزلزل حمایت کا اعادہ کیا۔ یہ بیان ایسے وقت میں سامنے آیا ہے جب طالبان حکومت نے دعویٰ کیا ہے کہ پاکستان نے افغانستان کے صوبوں پکتیا، پکتیکا اور کونار میں فضائی حملے کیے، جن میں 36 عام شہری جاں بحق اور 163 زخمی ہوئے۔ طالبان حکومت کے نائب ترجمان حمد اللہ فطرت کے مطابق حملوں میں رہائشی مکانات کو بھی نشانہ بنایا گیا، جبکہ ایک مقام پر امدادی کارروائیوں میں مصروف افراد پر بھی دوبارہ حملہ کیا گیا۔ دوسری جانب پاکستان نے ان کارروائیوں کی تصدیق کرتے ہوئے کہا ہے کہ سرحدی علاقوں میں ایک منظم انٹیلی جنس بنیاد پر زمینی اور فضائی آپریشن کیا گیا۔ پاکستان کے وزیراطلاعات عطاء اللہ تارڑ کے مطابق یہ کارروائی حالیہ دہشت گرد حملوں کے جواب میں کی گئی تھی۔ یہ تازہ فضائی کارروائی پاکستان کی جانب سے تین ہفتوں کے اندر افغانستان میں کی جانے والی دوسری بڑی کارروائی بتائی جا رہی ہے، جس کے بعد اسلام آباد اور کابل کے درمیان پہلے سے موجود کشیدگی مزید بڑھنے کا خدشہ ظاہر کیا جا رہا ہے۔ رپورٹ کے مطابق فروری سے جاری سرحدی جھڑپوں میں دونوں جانب سیکڑوں افراد ہلاک ہو چکے ہیں، جبکہ مختلف بین الاقوامی کوششوں اور چین کی ثالثی میں ہونے والے مذاکرات کے باوجود مستقل جنگ بندی قائم نہیں ہو سکی ہے۔

Source: social media