بہار بھر میں میٹرک کا امتحان منگل سے ، 15.12 لاکھ سے زائد طلبہ شریک ہوں گے

پٹنہ، 16 فروری :بہار اسکول ایگزامنیشن بورڈ کی جانب سے سالانہ میٹرک امتحان منگل 17 فروری سے ریاست بھر کے 1,699 امتحان مراکز پر شروع ہو رہا ہے ، جس میں 15.12 لاکھ سے زائد طلبہ شرکت کریں گے ۔ امتحان کو منصفانہ، شفاف اور نقل سے پاک ماحول میں منعقد کرانے کے لیے سخت اور جامع انتظامات کیے گئے ہیں۔ اس سال مجموعی طور پر 15,12,687 طلبہ نے امتحان فارم بھرا ہے ، جن میں 7,85,726 طالبات اور 7,26,961 طلبا شامل ہیں۔ پہلے دن دونوں شفٹوں میں مادری زبان (ہندی، بنگلہ، اردو اور میتھلی) کے پرچے لیے جائیں گے ۔ پہلی شفٹ کا امتحان صبح 9:30 بجے سے 12:45 بجے تک اور دوسری شفٹ کا امتحان دوپہر 2:00 بجے سے 5:15 بجے تک ہوگا۔ ہر شفٹ میں سوالنامہ پڑھنے اور سمجھنے کے لیے 15 منٹ کا اضافی وقت دیا جائے گا۔ امتحان کی پاکیزگی برقرار رکھنے کے لیے تمام مراکز پر سخت حفاظتی انتظامات کیے گئے ہیں۔ اس کے تحت دو سطحی تلاشی (فریسکنگ)، تین سطح پر مجسٹریٹوں کی تعیناتی، امتحان شروع ہونے سے 30 منٹ قبل مرکزی دروازہ بند، تمام مراکز پر سی سی ٹی وی اور ویڈیوگرافی کی سہولت، کسی بھی غیر مجاز شخص کے داخلے پر مکمل پابندی اور امتحان مرکز کے 200 میٹر کے دائرے میں بیرونی افراد کے داخلے پر روک عائد کی گئی ہے ۔ بورڈ کے چیئرمین آنند کشور نے تمام اضلاع کے ضلع مجسٹریٹ اور سینئر پولیس سپرنٹنڈنٹپولیس سپرنٹنڈنٹ کو ہدایت دی ہے کہ امتحان کے انعقاد سے متعلق تمام احکامات پر سختی، شفافیت اور مستعدی کے ساتھ عمل درآمد کو یقینی بنائیں۔ ضلعی سطح کے اعلیٰ افسران مسلسل امتحان مراکز کا معائنہ کر کے نگرانی کریں گے ۔ اسپاسٹک، بصارت سے محروم اور وہ معذور طلبہ جو خود لکھنے سے قاصر ہیں، انہیں سابقہ روایت کے مطابق اسکرائب رکھنے کی اجازت دی گئی ہے ۔ اس کے ساتھ ہی انہیں ہر گھنٹے کے لیے 20 منٹ کا اضافی وقت بھی فراہم کیا جائے گا۔ بورڈ نے واضح کیا ہے کہ امتحان میں کسی بھی قسم کی رکاوٹ یا بے ضابطگی پیدا کرنے والوں کے خلاف سخت کارروائی کی جائے گی۔ مقصد یہ ہے کہ ریاست کے لاکھوں طلبہ کا مستقبل محفوظ رہے اور امتحان پرامن، صاف و شفاف ماحول میں مکمل ہو۔ طلبہ کو مشورہ دیا گیا ہے کہ وہ امتحان شروع ہونے سے کم از کم 30 منٹ قبل امتحان مرکز پر پہنچ جائیں، کیونکہ مقررہ وقت کے بعد داخلے کی اجازت نہیں دی جائے گی۔

Source: UNI NEWS