ایچ-1بی کے بعد ٹرمپ حکومت کے ایک اور نئے اصول سے ہندوستانی شہری مشکل میں، ہزاروں پیشہ وروں پر بے روزگاری کی لٹکی تلوار

امریکہ کے ڈپارٹمنٹ آف ہوم لینڈ سیکورٹی (ڈی ایچ ایس) نے ایک تبدیلی نافذ کی ہے، جس کے تحت اگر وقت پر ان کی ملازمت سے متعلق اجازت نامہ کی تجدید کو منظوری نہیں دی گئی تو ہزاروں ہندوستانی پیشہ وروں اور ان پر منحصر افراد کو کام کرنا بند کرنا پڑے گا۔ واضح رہے کہ یہ اصول جمعرات (30 اکتوبر) سے نافذ ہو گیا ہے۔ نئے اصول کے مطابق ایمپلائمنٹ آتھورائزیشن ڈاکومنٹس (ای اے ڈی) کے آٹومیٹک ایکسٹینشن (خودکار توسیع) ختم ہو جائیں گے۔ اس کی وجہ سے غیر امریکی شہری وہاں کام نہیں کر پائیں گے۔ ’ڈی ایچ ایس‘ نے ایک بیان میں کہا کہ جو غیر ملکی شہری 30 اکتوبر 2025 کو یا اس کے بعد اپنی ملازمت کی اجازت کی دستاویز کی تجدید (ای اے ڈی) کے لیے درخواست دیں گے، انہیں اب اپنے ’ای اے ڈی‘ کو خود کار توسیع نہیں مل پائے گا۔ ای اے ڈی کے آٹومیٹک ایکسٹینشن کو ختم کرنے سے امریکہ میں کام کرنے کے خواہشمند غیر ملکی شہریوں کو اب کئی بار جانچ کا سامنا کرنا ہوگا۔ اب تک ملازمین 540 دنوں تک اپنی ملازمت جاری رکھ سکتے تھے، جب تک کہ ان کی تجدید کی درخواستیں منظوری کے لیے زیر التوا رہتی تھیں۔ نئے اصول کے تحت اگر کسی شخص کی موجودہ ای اے ڈی کی میعاد ختم ہونے سے قبل اس کی تجدید کی منظوری نہیں دی جاتی ہے تو اسے فوری طور پر کام کرنا بند کرنا ہوگا۔ ڈی ایچ ایس کی طرف سے جاری ایک بیان کے مطابق یو ایس سی آئی ایس نے غیر امریکی شہریوں کو مشورہ دیا ہے کہ وہ اپنے ای اے ڈی کی وقت مقررہ پر تجدید کی دراخواست درست طریقہ سے پُر کریں، تاکہ ان کی ای اے ڈی کی میعاد ختم ہونے سے 180 روز قبل تک تجدید ہو سکے۔ کوئی بھی غیر ملکی ای اے ڈی کی تجدید کی درخواست داخل کرنے میں جتنا تاخیر کرے گا، ان کی ملازمت کی اجازت یا دستاویز کاری میں عارضی طور پر اتنا ہی زیادہ غلطی کا امکان ہو سکتا ہے۔ واضح رہے کہ ٹرمپ حکومت کے اس فیصلہ سے ہندوستانی شہریوں پر بہت زیادہ اثر ہونے کی امید ہے، جو کہ امریکی تارکین وطن افرادی قوت کا ایک بڑا حصہ ہے اور پہلے سے ہی گرین کارڈ اور ویزا کے زیر التوا معاملوں میں پھنسے ہیں۔ سینئر وکیل ہنری لنڈپرے نے کہا کہ یہ اصول امریکہ میں ملازمت کی اجازت کی تجدید کے طریقے میں ایک بڑی تبدیلی کی نمائندگی کرتا ہے۔ جن کیٹیگریز میں ہندوستانی شہریوں کو اثر پڑے گا، ان میں او پی ٹی طلبہ، ایچ-4 ویزا اور گرین کارڈ درخواست دہندگان شامل ہیں۔

Source: social media