ای-20 پٹرول پر کیجریوال نے 29 آٹو کمپنیوں سے طلب کیا جواب، پرانی گاڑیوں کی حفاظت اور معاوضے پر اٹھائے سوال

نئی دہلی: ای-20 (20 فیصد ایتھنول ملا ہوا) پٹرول کو لے کر ملک بھر میں جاری بحث کے درمیان عام آدمی پارٹی کے قومی کنوینر اروند کیجریوال نے ملک کی 29 آٹو موبائل کمپنیوں کو خط لکھ کر مطالبہ کیا ہے کہ وہ پرانی پیٹرول گاڑیوں میں ای-20 پٹرول کے استعمال سے متعلق اپنا واضح اور تحریری مؤقف عوام کے سامنے رکھیں۔ کیجریوال نے کمپنیوں سے کہا ہے کہ وہ ایک ہفتے کے اندر یہ واضح کریں کہ آیا سال 2023 سے پہلے تیار ہونے والی پیٹرول گاڑیوں میں ای-20 پٹرول کا استعمال مکمل طور پر محفوظ ہے یا نہیں۔ انہوں نے یہ بھی پوچھا کہ اگر اس ایندھن کے استعمال سے گاڑی کی مائلیج کم ہو جاتی ہے یا کسی پرزے کو نقصان پہنچتا ہے تو کیا کمپنیاں کسٹمرس کو معاوضہ دینے کے لیے تیار ہیں۔ کیجریوال نے بتایا کہ 29 کمپنیوں میں سے تین بڑی آٹو کمپنیاں—ماروتی سوزوکی، ٹویوٹا کرلوسکر موٹر اور ہیرو موٹو کارپ—کو الگ سے خط بھیجا گیا ہے۔ ان کے مطابق ان کمپنیوں کے نمائندوں نے 4 جولائی کو منعقدہ ایک آفیشل پریس کانفرنس میں دعویٰ کیا تھا کہ پرانی گاڑیوں میں ای-20 پٹرول کا استعمال محفوظ ہے اور اس سے صرف 4 سے 5 فیصد تک مائلیج متاثر ہوتی ہے، جبکہ گاڑی کو کوئی تکنیکی نقصان نہیں پہنچتا۔ کیجریوال نے الزام لگایا کہ ان کمپنیوں کی سرکاری مالکانہ ہدایت ناموں میں سال 2023 سے پہلے تیار ہونے والی کئی گاڑیوں کے لیے 10 فیصد سے زیادہ ایتھنول ملا ہوا پٹرول استعمال کرنے کی اجازت نہیں دی گئی۔ انہوں نے کہا کہ اگر کمپنیوں کے ہدایت نامے اور عوامی بیانات ایک دوسرے سے مختلف ہیں تو اس سے کسٹمرس میں الجھن پیدا ہو رہی ہے، اس لیے کمپنیاں تحریری طور پر اصل حقیقت واضح کریں۔ انہوں نے تینوں کمپنیوں سے یہ بھی پوچھا کہ اگر ای-20 پٹرول استعمال کرنے کے بعد کسی گاڑی کی مائلیج 5 سے 10 فیصد سے زیادہ کم ہو جائے یا انجن یا کسی اہم پرزے کو نقصان پہنچے تو کیا کمپنی متعلقہ صارف کو مالی معاوضہ دے گی۔ اس کے علاوہ کیجریوال نے دیگر 26 آٹو موبائل کمپنیوں کو بھی خطوط ارسال کرتے ہوئے پوچھا ہے کہ کیا ان کی پرانی پیٹرول گاڑیوں میں ای-20 پٹرول استعمال کیا جا سکتا ہے، اس سے اوسطاً کتنی مائلیج کم ہوگی اور کیا اس کا انجن یا دیگر پرزوں پر کوئی منفی اثر پڑے گا۔ انہوں نے یہ بھی جاننا چاہا کہ اگر کسی گاڑی کو نقصان پہنچتا ہے تو کیا متعلقہ کمپنی اس کے لیے صارف کو معاوضہ دینے کی ذمہ داری قبول کرے گی۔ کیجریوال نے کہا کہ یہ صرف ایک تکنیکی مسئلہ نہیں بلکہ کروڑوں گاڑی مالکان کے مفاد سے جڑا معاملہ ہے۔ انہوں نے امید ظاہر کی کہ تمام کمپنیاں ایک ہفتے کے اندر اپنا آفیشل اور تحریری جواب دیں گی تاکہ گاڑی مالکان میں پائی جانے والی الجھن دور ہو سکے۔ انہوں نے اعلان کیا کہ جمعرات کو وہ دہلی کے چند پیٹرول پمپوں، گاڑیوں کے سروس مراکز اور مکینکوں سے ملاقات کریں گے تاکہ ای-20 پٹرول کے بارے میں کسٹمرس اور ماہرین کی رائے جان سکیں۔ کیجریوال کا کہنا تھا کہ حکومت ای-20 پٹرول کو محفوظ قرار دے رہی ہے، لیکن عوام کے عملی تجربات کو بھی سامنے آنا چاہیے۔ انہوں نے کہا کہ حکومت کو اس معاملے میں عوام کے خدشات کو سنجیدگی سے لینا چاہیے اور سائنسی حقائق کے ساتھ ساتھ کسٹمرس کے مفادات کو بھی اولین ترجیح دینی چاہیے۔

Source: social media